Sr. Castro Perez di Aruba Reef Care Foundation ta comenta tocante e preparacionnan p’e accion di limpiesa y e necesidad pa haya mas tanto boluntario posibel.
Sr. Perez ta splica cu nan ta hopi ocupa cu inscripcionnan di diferente sponsor y companianan cu tur aña ta contribui cu e accion di limpiesa. E campaña ta bayendo bon y nan ta trahando duro riba dje. Nan ta spera di por haya mas hopi boluntario posibel. E aña anterior nan tabatin mas o menos 700 boluntario, cual cantidad nan ta spera di por surpasa e aña aki. E boluntarionan por keda pendiente p’e shirtnan cu ta 5 florin pa un y alabes mantene un recuerdo di nan aporte den e limpiesa di beach y lama. Sr. Castro ta indica cu e problema di barinan cu falta den cierto areanan clave ta keda un punto di discusion tur aña, pero ta optimista cu por medio di proyecto di Aruba Tourism Authority (ATA), esaki por wordo realisa. E areanan cu nan ta sigui concentra riba dje ta cuminsa patras di Lighthouse, pasa tur e beachnan publico y yega te Grapefield y Boca Grandi. Sr. Castro ta enfatisa cu nan kier aumenta e cantidad di boluntario y conscientisa mas hopi hende posibel pa mantene beach y lama limpi. Esaki ta un esfuerso cu nan ta purba realisa cada aña cu apoyo di boluntarionan.
E invitacion pa forma parti di e accion di limpiesa aki ta riba Facebook caba. Tambe por mail nan na [email protected] of yama na 7400797. Personanan lo ricibi un formulario pa registra nan grupo.