Recientemente a tuma luga na Aruba e reunion anual di Ministerionan di enseñansa di Reino Hulandes. E asina yama Vierlandenoverleg Onderwijs ta un plataforma unda cu e paisnan den reino ta topa otro y intercambia y colabora riba diferente topico y area di atencion. E aña aki Aruba tabata anfitrion di e encuentro entre e paisnan den reino cu a conta cu presencia di Ministerionan di Enseñansa di Aruba, Corsou, Sint Maarten, Hulanda y islanan BES. Pa e encuentro di e aña aki a discuti y intercambia riba diferente topico den e areanan di enseñansa secundario, enseñansa vocacional y enseñansa superior.
Durante di e Vierlandenoverleg Onderwijs Ministerio di Enseñansa di Aruba a presenta e vision y maneho di Aruba pa mehora accesibilidad y oportunidad igual den nos sistema educacional. Durante e presentacion a enfoca riba e vision cu ta formula den e “Education Vision & Policy 2013-2017” di Ministerio di Enseñansa y Famia. E vision pa e sistema educacional di Aruba ta enfoca riba e potencial y talento di cada alumno, como tambe nan salud y bienestar social emocional. Importante den e vision aki ta cu ta reconoce cu ningun studiante ta exactamente igual pa loke ta nan talento, interes y necesidad y ta pesey mes e sistema educacional mester haci tur lo posibel pa cada alumno haya e oportunidad pa nan por logra nan potencial maximo. Conforme e vision esaki mester resulta den un nivel mas halto di siñamento y educacion, envolvimento civico y mihor contribucion na e economia y na sociedad en general. Importante den e vision cu a keda presenta ta cu e sistema educacional ta wordo guia door di educado, mayor y studiantenan envolvi y pasiona y cu tur ta reconoce e rol importante cu educacion ta hunga den crea un futuro sostenibel pa cada individual y pa e pais.
E delegacion di Aruba a duna un bista tambe di e contexto specifico di enseñansa na Aruba, e desaroyonan di e ultimo añanan riba nivel nacional y di e retonan cu esaki ta bin cune pa e sistema educacional. Como un isla chikito Aruba ainda ta enfrenta hopi reto pa asina por yega na un sistema educacional mihor accesibel, flexibel y unda cu e studiante ta realmente central. Aruba su poblacion y situacion socio-economico a cambia drasticamente e ultimo 20 pa 30 aña y esaki tin su impacto riba nos sistema educacional y nos scolnan. Aruba como un pais chikito ta hopi vulnerabel pa cambio y e sector di enseñansa tin cu explora continuamente riba strategianan sostenibel pa responde na un manera efectivo riba e cambionan constante den nos comunidad. Loke ta crucial den tur esaki ta cu e no ta un opcion pa keda haci mescos cu 20 aña pasa sin adapta y sin innova. Door di nos “changing reality” nos tin diferente area di atencion den nos sistema educacional, entre otro: maneho di idioma, inclusion di diferente grupo den comunidad manera imigrante y alumnonan indocumenta, e percentahe di dropouts y “push outs” riba nivel secundario, e percentahe di “zittenblijvers” riba nivel primario y secundario, y e rendimento di enseñansa superior. Ministerio di Enseñansa di Aruba a duna un bista tambe riba e resultadonan di mas importante for di e investigacion di UNICEF for di 2013 unda cu e organisacion a haci un estudio riba e situacion di nos mucha y adolecentenan na Aruba. Un di e conclusionnan di mas importante di UNICEF ta cu ainda Aruba su modelo di educacion ta mucho enfoca riba e sistema educacional Hulandes y no ta adapta suficiente na e contexto di Aruba y na e necesidadnan di e mucha y e adolecente Arubiano y cu ta biba na Aruba. E sistema educacional local falta contextualisacion y flexibilisacion segun e estudio di UNICEF.
Mirando e hecho cu e sistema actual di educacion ta solamente enfoca riba un modelo specifico, flexibilidad y diversificacion ta wordo presenta como e strategianan di mas importante pa logra introduci mehoracion y innovacion. E introduccion di modelonan educacional alternativo, ambos pa loke ta idioma di instruccion pero tambe a base di concepto pedagogico-didactico, ta esencial den e proceso di adaptacion y diversificacion di nos sistema educacional pa asina esaki por refleha nos realidad moderno. Esaki ta encera e exploracion y implementacion di conceptonan educacional nobo den cuadro di diversificacion cu por co-existi cu e concepto y structuranan existente. E strategia ta encera ambos flexibilisacion di e structuranan actual como introduccion di structuranan nobo. Aki por pensa riba brinda loke tin actualmente den enseñansa secundario, vocacional y superior como opcionnan part-time, introduccion di trayectonan dual unda cu por combina traha y studia, introduccion di mas estudio y trayectonan na Ingles of bilingual y asina por menciona mas iniciativanan concreto como parti di e vision y maneho pa flexibilisa y diversifica nos sistema di enseñansa.
Durante di e presentacion di Aruba a splica cu actualmente nos ta introduciendo maneho y haciendo e adaptacionnan necesario pa sostene e alumnonan di mas vulnerabel y menos privilegia den nos sistema educacional. Aruba ta haciendo esaki door di introduci mas y mihor guia y sosten na alumnonan ambos den scol como pafor di scol y door di elimina cualkier barera of obstaculo cu por tin den e sistema educacional cu ta complica transicion di un nivel pa otro y door di elimina practicanan di exclusion. Ehempelnan di esaki ta e ampliacion y mehoracion di e structuranan externo di guia y sosten pa “at risk students” via di Multidisciplinair Centrum (MDC), e proceso di nacionalisacion di normanan di admision y di transicion. Tambe e introduccion di Summer-Schools pa facilita e transicion di Mavo pa Havo y planes pa expande e concepto pa asina minimalisa e fenomeno di keda sinta den enseñansa secundario y introducion di maneho nobo riba e fenomeno di keda sinta den enseñansa primario hunto cu un proyecto piloto den scolnan publico pa elimina keda sinta den klas 1. Banda di tur esaki a mustra e esfuersonan unda ta invertiendo den e profesionalisacion, sosten y reconocemento di maestronan.
E reaccionan di e partnernan den reino tabata hopi positivo riba e vision y maneho cu Aruba a presenta. E demas paisnan ta reconoce hopi di e puntonan cu a keda presenta como puntonan di antencion den nan mesun sistema educacional, vooral riba e topiconan di accesibilidad y oportunidad igual. E paisnan a palabra cu lo colabora hunto riba e temanan aki y lo intercambia informacion, datos y best-practices cu otro.