Aruba Ports Authority ta ilumina “turbo rotonde” den ambiente di Pasco

Manera un tradicion, esaki ta di 5 aña consecutivo cu Aruba Ports Authority (APA) ta percura pa ilumina y decora e rotonde net dilanti waf na Playa, den un esfuerso pa transmiti e ambiente di paz, harmonia y di celebracion den e dianan di fiesta aki.

Den un ambiente entre coleganan un biaha mas a dorna e rotonde cu tokenan special. Managing Director/CEO di APA, Marc Figaroa a bisa di ta hopi orguyoso di e team interno di APA hunto cu Alida Wong y Jeremy Rasmijn, cu a traha hunto cu e meta pa comparti e ambiente di Pasco cu henter nos comunidad y turistanan cu diariamente ta pasa riba e rotonde aki.

Marc Figaroa a probecha pa para un rato keto y observa e desaroyonan positivo cu APA a pasa dor di nan e aña aki y sin lubida e lista di oportunidadnan nobo cu ta na caminda pa 2020.,. Den e mundo maritimo, locual a corda awe ta bay den ehecucion den un pa dos aña. Pa e motibo aki ya ta permira cu si tur cos sigui cana manera cu ta pronostica,otro aña lo bira un aña positive un vez mas pa e industria di waf di nos isla, tanto pa e aspecto di crucero como tambe na nos waf di cargana Barcadera.

E master plan di APA ta kedando cla y si tur cos cana manera premira, lo present’e asina aña nobo habri na e stakeholdersnan y splica kico ta e vision di APA pa e proximo 10 añanan.

Managing Director/CEO di APA Marc Figaroa a termina su discurso cu un danki grandi na henter e ekipo di APA pa a brinda lo mihor di nan mes y asina juda contribui pa un 2019 sumamente positivo. Y ta desea hender e ekipo di APA y e communidad di Aruba un bon pasco y un prospero aña nobo.

Comments

comments