Durante un encuentro cu prensa, Bureau City Inspector (BCI) a elabora ariba e topico di campamento. Sr. Robby Rosel, vocero di BCI a splica cu nan ta sumamento contento con e campamento a bay na Aruba, e aña aki.
Aruba a sa di bay campa y a comporta nan mes, tremendamente bon. Di parti di BCI nan a felicita e pueblo di Aruba cu e campamento aki, unda cu nan a sa di mantene nos beachnan limpi y bunita. E team di BCI tabata rond di lama y tambe ariba camindanan pa por a controla tur locual ta e parti di limpiesa.
Conhuntamente cu Serlimar nan a reparti saco pa tur esunnan cu tabata na beach, cu tabata campando, pa asina nan por a pone locual ta nan desperdicio aden. Serlimar a pasa recoge esakinan durante dianan di campamento.
Por bisa tambe, segun Rosel, cu e parti di Arashi tabata e parti sumamente limpi, ordena y bon hinca den otro, unda cu por bisa cu tent y trailernan tabata pone nan saco di sushi, pa mainta ora cu Serlimar pasa recoge sushi, pa por bay cu tur pa locual ta desperdicio. Y sigur por a mira tambe, cada un di e personanan cu tabata campa a sa di haci e parti di limpiesa. Nan a corta e yerbanan, nan a pone nan tentnan, arma tur cos. Y mesun cos a pasa dia 28, ora cu nan mester a kita tur locual cu nan a arma.
Pa loke ta e pallet, esaki no a wordo uza den niun di e areanan unda cu tabata campa. Sea na Arashi, Palm Beach, tambe San Nicolas, Savaneta y Bushiri. Un palabra di pabien. E mensahe a cuminsa yega e pueblo di Aruba. E mensahe unda cu a bisa cu no ta permiti pa uza palet ni carton, esaki a yega na e pueblo di Aruba. P’esey e Bureau di City Inspector ta contento conhuntamente cu Ministerio di Medio Ambiente, nan ta logrando pa esaki bira realidad. Asina tambe ta felicita henter e pueblo di Aruba, cu un temporada di campamento sumamente exitoso e aña aki.