Aruba Tourism Authority, Ministerio di Turismo, Aruba Ports Authority, Aduana di Aruba, y agente SEL Maduro & Sons tabata e representantenan di e delegacion di Aruba y orguyosamente a ricibi dia 16 di November e crusero di Carnival Magic y 22 di November e crucero TUI Discovery y Carnival Vista na Aruba.
Carnival Magic
Carnival Magic ta forma parti di Carnival Cruise Line cu ta aporta cu mayoria pasahero crucero na Aruba. Durante e prome bishita di e crucero aki e capitan di Carnival Magic, señor Antonio Marchetti a intercambia plakkaat cu e representantenan di e delegacion di Aruba. Señor Mario Arends, Cruise Manager di Aruba Tourism Authority a hiba palabra di gradicimento na e Capitan y a duna un bon bini na e pasaheronan y e tripulacion di e crucero y alabes a invitanan pa nan disfruta di nos dushi Aruba. Tambe a hiba palabra e director di SEL Maduro & Sons, señor Hans van Esveld cu ta agente di e Carnival Cruise Line cu ta bishita Aruba.
E crucero Carnival Magic a bay den operacion na aña 2011 y tin un capacidad maximo di 4,675 pasahero y 1,380 miembro di tripulacion. E barco ta midi 306 meter di largura. Aruba ta bai ricibi mas bishita di Carnival Magic durante 2017 riba fechanan 6 di Juni, 7 di Juli y 29 di Augustus.
Carnival Vista
Carnival Vista cu tabata tin su prome biahe na mei di e aña aki ta e barco mas nobo cu ta forma parti di e flota di Carnival Cruise Line. Durante su prome bishita e capitan di e crucero Carnival Vista, señor Stefano Battinelli a intercambia plakkaat cu e representantenan di e delegacion di Aruba cu ta consisti di Mario Arends, Cruise Manager na A.T.A., Johnny Martes, Risk manager di Aruba Ports Authority, y tambe Mariela Fingal di parti di SEL Maduro and Sons. Marisol Sanchez di parti Ministerio di Turismo y Roderick Wouters di parti AduanA di Aruba tambe tabata presente pa cu e acto ceremonial.
E crucero aki tin un capacidad maximo di 3,935 pasahero y 1,450 miembro di tripulacion. E barco ta midi 324 meter di largura y tabata tin un costo di 780 miyon dollar Mericano pa construi. Carnival Vista a bishita hermana isla Boneiro prome cu a yega Aruba y a sigui despues pa St. Maarten.
TUI Discovery
Durante e prome bishita di TUI Discovery e capitan di e crucero, señor Jason Ikiadis a intercambia plakkaat cu e representantenan di e delegacion di Aruba cu ta consisti di Mario Arends, Cruise Manager na A.T.A., Johnny Martes, Risk manager di Aruba Ports Authority, y tambe Graceo Dunlock di parti di SEL Maduro and Sons. Ademas Minisetrio di Turismo a wordo representa door di Marisol Sanchez.
E crucero aki tin un capacidad maximo di 2,076 pasahero y 720 miembro di tripulacion. E barco ta midi 264 meter di largura. E barco aki tabata forma parti prome di e flota di Royal Caribbean International bou di e nomber di Splendor of the Seas y a wordo cumpra pa TUI na Maart di aña pasa y despues di un renobacion a haya e nomber di TUI Discovery. TUI Discovery tabata proveniente di e Puerto di Barbados cu gran mayoria di e pasaheronan ta di Inglatera.
Aruba Tourism Authority ta contento cu e desaroyo di e industria di crucero y manera a ser anuncia caba ta premira bon resultado pa 2016. Pa 2017, Aruba ta proyecta di ricibi alrededor di 746 mil pasahero di crucero. Den e cuadro di turismo crucero, di Januari pa October Aruba a ricibi un total 222 calls y 477,575 pasahero compara cu 213 calls y 435,559 pasahero den e mesun periodo di aña 2015. E desaroyo aki ta representa un incremento di 4.2% den calls y 9.6% di pasahero.
Aruba Tourism Authority ta reconoce e importancia di un strategia agil y diversifica pa e industria turistico y ta duna un cordial bon bini na Carnival Magic, Carnival Vista, TUI Discovery y na nan pasahero y miembronan di tripulacion.