Recientemente, danki na e cooperacion di Payaso Loko Loko y Amazing Alex, nos Grandinan di Stichting Thuiszorg Jaburibari a haya bishita di Santa Claus y su ayudante. Tabata un mainta di gozo, alegria y atencion pa nos grandinan cu ta residencia na e centro aki. Santa Claus y su ayudante a canta y baila cu nos Grandinan bunita canticanan di pasco. Nos Grandinan a haya un treat tambe di koeki pasco cu juice di parti Aruba One Happy Island Lions Club.
Tur Machi y Pachi di e centro a keda masha contento. Igualmente gerencia y personal di St. Thuiszorg Jaburibari a aprecia e bunita gesto brinda na nos grandinan. Atencion na nos grandinan sigur ta trece alegria den nan curazon y p’esey un apelacion na famia y amistadnan pa regularmente haci un bishita y duna atencion na nos grandinan.
Aruba One Happy Island Lions Club ta gradici Payaso Loko Loko y Amazing Alex pa brinda nos grandinan un mainta yen di alegria den e ambiente di pasco. Danki St. Thuiszorg Jaburibari pa e oportunidad brinda.