Diahuebs dia 14 di November proximo ta Dia Mundial di Diabetes y e aña aki Aruba One Happy Island Lions Club ta scoge pa un campaña di prevencion di e malesa Diabetes door di informa, educa y concientisa nos comunidad riba e tema aki. Diabetes ta un epidemia global cu ta afecta hende homber, muher y muchanan diariamente rond di mundo. Diabetes ta un di e causanan principal di malesa cardiovascular, ceguera, problema cu riñon y amputacion di pia. Ta ser calcula cu un 629 miyon di persona lo ta afecta pa aña 2045. Club di Lions como organisacion di servicio comunitario, nos ta comprometi na yuda resolve e problemanan mas grave di mundo. Diabetes ta un di servicionan global di e 5 areanan, cualnan ta un desafio considerabel pa nos humanidad y nos ta kere cu ta nos deber pa enfrenta esaki. Aruba One Happy Island tin varios actividad relaciona e Dia Mundial di Daibetes y diahuebs dia 14 di November proximo hunto cu nos Colaborador Dr. Dellanire Maduro ta organisando un Charla Interactivo na MFA Paradera di 7 ‘or pm pa 9’or pm cu tin como tema “Diabetes kico bo sa di diabetes y cuanto riesgo bo ta core pa haya diabetes ?”. E charla aki ta publico y e enfoke ta pa comunidad hiba un bida saludabel y evita di haya e malesa di Diabetes. Dr. Dellanire Maduro, medico general, un dokter naci na Aruba cu a bay studia na Costa Rica na 2009 y a gradua como medico na aña 2016. Despues di a bolbe Aruba, Dellanire a bin ta dedica e.o. como praktijkondersteuner huisartsen specialmente pa personan cu enfermedadnan cronico manera diabetes, presion halto etc. Dr. Dellanire Maduro ta duna diferente charla riba e tema di salud. Bo por confirma bo presencia via whatsapp: 746-0428 / 569-0237 of manda un email na [email protected].