Aruba one happy island Lions club a haci plastic beach limpi un biaha mas

Nos Medio Ambiente ta un di programanan global di servicio di Lions Club Internacional y cumpliendo cu e programa di servicio internacional diasabra cu a pasa, mainta tempran pa 6 or y mey miembronan di Aruba One Happy Island Lions Club tabata riba pia yen di animo na Colorado riba Plastic Beach pa haci un limpieza. Manera ta conoci desde 2017 Aruba OHIL Club a adopta e beach aki y regularmente ta haci esaki limpi. E biaha aki e compania local Scuba Caribe tambe a duna un man y hunto cu miembronan di Aruba OHIL Club a piki un cantidad di boter y otro artefactonan di plastic, mata, yerba y palo, a hark y hasi e beach limpi y bunita. Un 20 saco grandi cu sushi a wordo piki. E miembronan a haya a treat di parti Scuba Caribe den forma di diferente fruta y juice pa asina refresca y haya mas energia pa cumpli cu e meta di haci Plastic Beach limpi, conservando nos medio ambiente den bon forma. Un danki ta bay na e compania Scuba Caribe y e empleadonan cu a pone nan dia liber disponibel pa obra na bienestar di nos comunidad y mantene nos medio ambiente limpi. Despues di 3 ora di trabao duro por a mira e caranan di esnan cu a participa poco cansa y kima di solo pero si hopi contento di a haci un otro bunita obra di servicio na bienestar di nos comunidad

Comments

comments