Aruba Offroad Foundation: Nos kier traha hunto pa busca solucion pa cu e tema di ATV y UTV

Recientemente Gobierno a sinta na mesa cu algun instancia riba e tema di UTV / ATV cu e meta pa yega na solucionnan harmonioso pa cu medio ambiente y existencia di e companianan di vehiculonan aki. George Viera, vocero di e asociacion di doñonan di companianan di UTV / ATV ta mira e iniciativa aki cu bon wowo.

Viera ta kere cu participacion di tur stakeholder, cu sugerencianan, por trece un solucion cu ta protege naturalesa, protegiendo cuponan di trabao y alabes esun di e compania y di Gobierno. E asociacion tin mapnan cla cu sugerencia.

Un di na ta, por ehempel, pone piedranan grandi dilanti areanan cu no ta permiti pa cruza. Asina por haci na e duinennan cu ta hopi habri awo. Si pone piedra, por pone borchi grandi y e ta mas visibel di unda por pasa y unda no. Esaki ta manera tin den parke nacional tambe, riba e ruta pa e cuebanan. Na mesun momento e ta evita accidentenan.

E operadornan ta ansioso pa haya un reunion cu Prome Minister pa splica nan ideanan di tur loke por wordo haci, cu ta trece un win-win situation pa tur hende.

Aworaki manera e situacion ta wordo pinta, segun Viera, ta comosifuera tur dia tin accidente y morto a causa di e vehiculonan aki. “Si tabata asina, ningun compania ta bende seguro y ningun turista lo huur e vehiculonan aki.” E turistanan ta bin goza y mester demostra nan unda por pasa of no.

Esnan cu ta organisa no ta pasa den tour. Personanan cu ta huur e vehiculonan aki riba nan mes, ta wordo bisa tur e luganan unda no ta permiti pa pasa cu UTV/ ATV. Hopi hende ta papia sin busca e berdad. Operadornan sigur ta informa tur cliente kico por y kico no por haci.

E ta compronde cu e tipo di vehiculonan aki ta hopi den demanda cerca bishitantenan hoben, inclusive cerca esnan local, pa disfruta di e isla. E ta un tipo di vehiculo hopi popular.

Aruba Offroad Foundation tin 15 miembro. Tin mas cu 30 compania cu ta huur e vehiculonan operando di forma legal. Ta na su luga pa pone of tuma e medidanan pa protege e medio ambiente pero tambe sigurando e cuponan di trabou. Inclusive e compania lo por coopera pa yuda pone e borchinan.

Comments

comments