Aruba Ocean Villas a cera un aliansa cu e plataforma social di e-commerce Foundeers.com pa recauda un suma como donacion na Fundacion Pa Nos Comunidad. Tur e cen cu a recauda via un subasta a bai 100% pa Fundacion Pa Nos Comunidad.
Foundeers ta yuda recauda fondo pa diferente causanan cu ta bai directo como donacion di benta, producto/servicio of subasta. E gerencia di Aruba Ocean Villas ta consciente cu den e temponan difisil aki cu nos como comunidad mester yuda otro.
Fundacion Pa Nos Comunidad (FPNC) Aruba ta e Banco di Cuminda oficial di Aruba. Nan mision ta pa combati pobreza y stress emocional y ta promove participacion, cuido y bienestar di esnan cu menos recurso. E Banco di Cuminda aki ta yudando aproximadamente entre 150 pa 200 famianan Arubano pa luna (rond di 2000 famiapa aña) cu retonan financiero desde 2009 cu macutonan di cuminda. Esaki no ta posibel sin e sosten financiero di sponsor of donacion.
Den e temponan difisil aki, nos mester pensa mas ariba yuda otro. Aruba Ocean Villas a subasta estadia na un di nan luhoso bungalow pa por recauda un suma pa duna como donacion pa e bon causa aki.
Pa mas informacion pa haci bo donacion of yuda, por bai na www.fpnc.aw, yama 5880002 of e-mail: [email protected]