Pa locual ta e ultimo desaroyonan di CITGO y su futuro, Minister Presidente, Sra. mr. Evelyn Wever – Croes a splica cu e situacion cu CITGO ta mesun cos.
E contract ta ‘in place’ y tur cos ta mustra cu e contract ta vigente te cu 2020. Si bay tuma e riesgo di bay sali aworaki, e ta trece riesgonan grandi pa pais Aruba. Y mirando e situacion di Aruba ariba tereno financiero, no por bay core un otro riesgo mas. No tin mucho claridad ariba e tema aki, otro cu otro ta den estudio pa mira con hopi a wordo inverti of no.
Minister Presidente a bisa di lo kier tuma su tempo pa por tuma un decision hopi bon balansa cu e tema aki, pa no trece mas problema pa Aruba, cu nos tin caba. Consecuentemente, e situacion ta igual. Pa loke ta e rumor, cu si CITGO ta prepara pa sali afo, esaki Minister Presidente mes no a haya niun confirmacion di esaki. Pa basta tempo, luna, no tabata tin reunionnan entre Aruba y delegadonan di CITGO. Dus nada a cambia ariba e tereno aki, otro cu ta studiando bon e pasonan cu Aruba mester tuma.
San Nicolas Business Association a expone nan idea na gobierno y esakinan ta ideanan hopi bon, cu ta pas den vision di gobierno, den proyecto di area cu gobierno a lansa pa Playa y San Nicolas. Minister Presidente a bisa cu San Nicolas Business Association ta pas hopi bon den esaki. Ta papia di fast ferry, basha e cura di Lago abao, pone un promenade banda di lama, caminda e fast ferry ta yega, pone restaurant, camidna cu hendenan por bin hunto y pasa un rato agradabel.
Esaki tabata forma parti di campaña y gobierno ta sostene e ideanan. No ta tur minister a duna nan opinion tocante nan ideanan ariba esaki, p.e. e tema di universidad. Pero en general, pa trece bida bek den San Nicolas, e plan ta uno hopi bon hinca den otro. Sin embargo, nan sa tambe cu no por traha niun plan pensando cu e refineria no t’ey mas. Pero ta trahando un plan, teniendo cuenta cu e refineria eynan. Ora bisa cu ta basha un pida muraya abao, ta parti di e tereno cu no ta wordo uza toch. Ni pa refineria y si e refineria no lo t’ey mas, por cuminsa basha e muraya na Lago abao y habri e luga te na lama, pa trece un desaroyo apart. Un desaroyo unico den San Nicolas. Y ohala cu por acopla esaki na e unda e fast ferry ta bay yega.
E Raad di Comissaris di RDA ta den constante contacto cu CITGO y e contesta cu ta haya cu nan ta trahando pa haya e placa, pa nan haci inversion. E storia aki no a cambia nunca. Pero e hecho ta cu nada no a cambia ainda, ariba esaki. Te asina leu, declaracionnan di Sra. mr. Evelyn Wever- Croes, ariba loke ta desaroyonan pa cu CITGO.