No falta mucho pa cada persona haya e oportunidad pa eherce nan derecho fundamental cu ta vota pa e programa, plataforma, partido of persona cu mas nan ta identifica nan mes cune. Cada persona lo mira den profundo di nan ser si ta sigui cu e mesun programa exsistente of ta duna oportunidad na un otro plataforma pa trese cambionan, segun candidato riba lista di partido POR, Michella Steenvoorde-Lacle.
Un di e puntonan cu ta domina un decision sigur ta expectativa y obligacion. E otro ta pobresa y e falta di premira e pobresa interno pa tuma e decision necesario.
Pobreza ta encera miedo, stress y depression y ta aki ta unda e punto debil ta sinta na momento di vota. E miedo di represalia, e miedo di keda sin nada, e miedo di keda atras ta loke ta pusha un persona pa no vota segun su curason pero lo vota pa miedo di faya. Cada persona mester por comprende cu fayonan den bida tin bez ta inevitabel. Pero ta keda na cada un di nos pa vota cu curashi y sin reserva.
Masha poco ta tuma e curashi y halsa nan voz. Otronan cu si tin e curashi ta halsa nan voz no solamente pa nan mes pero pa tur cu no por of no ta tribi pa hasi tal.
E curashi pa reconstrui bo bida, pa anadi siguridad na bo mañan y e mañan di bo sernan keri, bo yiunan, bo comunidad ta den e voto cu lo wordo duna hustamente y cu balor.
Un di e puntonan cu sigur lo mester tene cuenta cun’e y cu ta un parti interesante ta nos grandinan cu ta wordo poni un banda y na unda e productividad di e grupo aki ta bira cada dia menos. Ta como si fuera ora un persona cumpli 60 e no tin cupo mas den un sociedad. Hopi ta e partidonan cu ta basa nan mes riba e hobennan lubidando cu esunan di edad ta un mayoria hopi grandi y cu nan bida tin significacion y balor. Esaki merece un cambio.
Aruba tin un problema social hopi grandi, y ta keda na cada persona pa ta parti di construccion di e nos nacion, di nos hobenan. Ta dor di yuda otronan nos ta yuda nos mes. E paradigmo di servicio ta na momento cu bo ta haci di bo trabao, bo ayudo, un regalo, un regalo cu bo ta laga atras. Tin masha hopi grandinan cu ta na cas cu tin e habilidad di atravez di consultanan yuda e hobennan pa sa mas di nos custumbernan, di nos cultura. Cu ta dispuesto pa comparti den abundancia cu otronan. E programa di Traimerdia, incopora den scolnan cu ta bay mas largo cu 1.15 lo por wordo incorpora door di grandinan tambe cu nan cuentanan, nan sabiduria encuanto nos custumbernan. Statistica ta mustra cu un hoben ta scucha mucho mas liher for di un grandi cu for di un hoben.
Y si nos ta sincero un grandi lo haci esaki cu amor ya cu pa nan grandesa ta representa servicio. E duna di nan banda y laga atras nan sentimento na momento cu nan touch e curason di e hoben, ta di significacion grandi. Ta pa e motibo aki cu mester introduci procedura y facilidadnan pa mehora e guia y enseñansa na alumnonan cu problema di comportacion (por ehempel mediante “rebound school” y “summer school” y inclui nos grandinan tambe di ayudo. Aki mester di e cambio.
E perdida di confiansa di nos grandinan, NO mester ta un obstaculo, e perdida di contacto cu e comunidad aki cu consecuencia cu comunidad ta sinti su mes neglisha NO mester ta e motibo pa keda sin vota. Al contrario sin pensa dos biaha nos mester ta conciente cu e voto e biaha aki mas cu nunca ta e manera pa laga atras bo herencia. Bo regalo cu bo ta laga atras na momento cu Bo decision y bo curashi a cambia e destino di bo nacion. Sea honesto cu Bo mes y hasi e decision cu lo cambia bo bida y esun di bo yiunan. Y laga e scuridad cu ta eherce actualmente riba nos Aruba bira luz y no polarisa pa interes personal. No falta hopi pa e dia di votacion y mas cu nunca Aruba merece un resultado miho.