Durante e siman di 7 di November, Aruba Marriott Resort a celebra Marriott su Global Customer Appreciation Week cual ta un siman reserva specialmente pa demostra aprecio y gratitud na Marriott su cliente y socionan na Aruba como tambe den exterior.
Global Customer Appreciation Week (GCAW) ta un iniciativa di Marriott International, celebra tur aña na propiedadnan di Marriott rond di mundo pa asina reforsa relacionnan cu clientenan existente como tambe establece conexion cu clientenan nobo. E ta tambe un tremendo oportunidad pa realsa e calidad halto di servicio brinda na Marriott su clientenan por medio di Marriott su asociadonan briyante.
Pa lansa e siman special aki, Aruba Marriott Resort a organisa un evento social diabierna 4 di November 2016 invitando cliente y socionan pa experiencia “The Science of Happiness”, un sesion bunita tocante felicidad duna door di Sra. Catherine Sanderson, un orador internacional. Despues di e sesion aki tur invitado a wordo dirigi pa e otro seccion di e ballroom pa e evento social, cual a wordo prepara cu un setup impresionante consistiendo di un video mapping inovativo, un mixology bar y sin fin di hors’ devours prepara pa e hotel su team culinario.
Durante siman e team di Sales hunto cu e Executive Team di Aruba Marriott Resort a haci un bishita special na clientenan local sorpresando nan cu regalito como un cariño di aprecio pa nan sosten continuo ricibi durante e aña. Adicionalmente, Aruba Marriott Resort a sigura pa duna atencion tambe na clientenan den exterior haciendo yamadanan internacional hunto cu e hotel su Executive Team pa asina demostra e gratitud imenso pa nan confiansa y negoshi.
Aruba Marriott Resort kier gracidi un biaha mas tur su cliente y socionan pa un tremendo 2016 y ta spera di por traha hopi aña mas hunto. Un danki special na Rosetty Eleanora di The Perfect Team y Elite Productions pa nan colaboracion excepcional pa locual ta e setup impresionante di e customer event.