Aruba Marriott Resort Cup 2016 a inicia cu un tremendo partido entre Noord Football College y Estrella

E Aruba Marriott Resort Cup 2016 a inicia dialuna 22 di Augustus cu un tremendo partido entre e hobennan di Noord Football College y Estrella.
Como un di e sponsornan di e ekipo di Noord Football College, Aruba Marriott Resort tabata sumamente entusiasma pa por carga e nomber di e torneo aki como cu esaki ta brinda un oportunidad na e hobennan pa practica e tecnicanan cu nan ta siña durante training y alabes experiencia e sensacion real di un competencia di voetbal.
Pa oficialmente inicia e prome wega di e Aruba Marriott Resort Cup 2016, Sr. Tom Calame, Complex GM di Aruba Marriott tabata presente pa asina desea e ekiponan suerte como tambe haci e prome kick-off oficial di e competencia. Noord F.C. a gana e prome wega 12 – 0 contra Estrella.
E partidonan lo ta tumando lugar e siman aki na Centro Deportivo Frans Figaroa cuminsando pa 4or di atardi, cu partido final tumando luga diabierna 26 di Augustus 2016. E ekiponan participando ta Noord Football College, Estrella, S.V. Britania y Academia Deportiva Cantoloa di Peru.

Comments

comments