Raoul Lemmerling ta un nativo di Hulanda y lo brinda su experencia internacional na Aruba como e General Manager nobo di Aruba Marriott. Lemmerling lo supervisa e operacion diario, desaroyo di e personal, presupuesto, planificacion financiero y satisfaccion di huesped pa Aruba Marriott Resort & Stellaris Casino, Marriott’s Aruba Surf Club y Marriott’s Aruba Ocean Club.
Lemmerling ta un hotelero pasiona cu mas di 20 aña di experencia, kende a atende Hotel Management School na Amsterdam prome cu el a forma parti di e cadena di Marriott. El a desaroya su carera como gerente den Europa por medio di diferente funcion nan operacional y comercial, incluyendo General Manager pa e famoso Westin Paris Vendome y London Marriott County Hall. Lemmerling no ta un desconoci pa e maneho di varios hotel, como cu el a sirbi como Cluster General Manager pa shete hotel di Marriott na London. Y awo e lo trece su talentonan na nos “One Happy Island” Aruba durante un temporada unda biahamento ta bek den su temporada halto.
“Mi ta sinti honra pa por dirigi un compleho y resort riba clase mundial, specialmente durante un momento asina importante pa e industria di biahe,” a comparti Lemmerling. “E ta un inspiracion pa wak asina hopi turista y doñonan di timeshare regresa Aruba di bishita y pa wak nos team contento haciendo locual nan ta gusta, cual ta pa ofrece e miho servicio na nos huespednan. Tin un demanda evidente pa por relaha y biaha, y mi ta hopi entusiasma pa por traha cu e team dedica aki pa asina yama un caluroso bon bini na nos turistanan”
Lemmerling ta domina Hulandes, Aleman, Ingles y Frances y ta desea di siña e idioma Papiamento y añadi esaki na su repertorio di lenguahe, como tambe establece relacio nan duradero cu e comunidad local.
“Cu un carera exitoso cu hopi logronan dentro di e famia di Marriott, Raoul ta fit perfectamente,” Carolina Voullieme León, Directora di Bentas y Mercadeo, a expresa. “Mirando pa futuro, nos ta sigur cu Raoul lo uza su experencia y experticio pa pusha nos team pa sigui prospera y garantisa satisfaccion di tur huesped.”
E compleho di Aruba Marriott ta consisti di Aruba Marriott Resort & Stellaris Casino cu 414 camber, Marriott Aruba Ocean Club cu 311 camber y Marriott Aruba Surf Club cu 900 camber. E compleho di Aruba Marriott ta esun mas grandi den Caribe den locual ta cantidad di camber y empleadonan.