Aruba lo ta sede di “FIVB Woman’s Volleyball Championship Qualification Tournament” cu lo tuma luga ariba e dianan 26 & 27 di November, 2016 den Centro Deportivo Betico Croes. ARUBA lo ricibi e Paisnan HAITI, MARTINIQUE y SURINAM cu lo enfrenta e Seleccion Femenino di ARUBA.
Aruba Volleyball Association bao presidencia di Sra. Filomena Daniel–Curiel a ricibi for di FIVB/NORCECA e invitacion pa ta sede di e Campeonato Mundial aki y Aruba a tuma e reto pa organisa e Campeonato aki na Aruba.
E Seleccion Femenino di Aruba, bao guia di Head Coach Sr. Daan Kleinbussink, Assistant Coach Irald Phelipa y Team Manager Debby Alleyne, a prepara nan mes bon y ta cla pa enfrenta nan contrincantenan cu e meta pa clasifica pa e di dos buelta di e Campeonato Mundial aki.
Head Coach: Daan Kleinbussink, Atletanan: Shaira Mackay, Shekeva Jones, Sharifa Nedd, Jacky Toussaint, Ghislaine van der Linde, Charlotte Heemstadt, Julianne Dorothal, Kayla Arends, Iraida Dorothal, Nakisha Winkaar, Maybeline de Cuba y Team Manager Debby Alleyne.
E Paisnan Haiti, Martinique, Suriname y Aruba tur lo enfrenta otro y e dos Paisnan cu miho puntuacion lo pasa pa e di 2nd rond di e “FIVB Women World Championship” cu lo tuma luga otro aña na Trinidad & Tobago.
For di akinan tur Organisacionnan afilia na Aruba Volleyball Association, tur dirigente, atletanan y muy especialmente e fanaticada grandi di e deporte di volleyball ta ser invita pa bin presencia tremendo weganan di volleyball y alabes apoya e Seleccion Femenino di Aruba cu sigur lo bay duna bataya pa logra Aruba su clasificacion.