For di dia 6 pa 15 di juli, nos isla di Aruba lo ta pais anfitrion di un campeonato grandi di baseball Little League ora cu e campeonato Latino Americano di Junior League 2018 tuma luga riba nos terenonan di baseball. Na 2013 ta e ultimo aña cu Aruba a organisa un campeonato Latino Americano di baseball casualmente den tambe den e categoria di Junior league. Mester bisa cu tanto Aruba 1 forma pa e campeonnan 2018 esta Liga Central Braulio Wester y Aruba 2 forma pa un combinacion North/South League lo representa Aruba den e campeonato Latino Americano mirando cu nos ta host e campeonato. Remarcabel ta cu 7 pais a confirma nan participacion pa e torneo aki. Paisnan cu lo t’ey presente lo ta Curacao, Puerto Rico, Venezuela, El Salvador, Panama, Republica Dominicana y Colombia. Hunto cu Aruba 1 y Aruba 2 lo ta nuebe seleccion den total. Algun di e weganan cu lo tuma luga den Joe Laveist Ballpark, mientras e sobra lo ta den Nadi Croes y Crismo Angela Ballpark na Sta Cruz. Mayoria wega di Aruba lo wordo hunga den oranan di anochi.
E dos seleccionnan di Aruba ta bon prepara pa e campeonato Latino Americano di baseball. Tur dia nos hoben peloteronan ta entrena pa asina duna e miho prestacion posibel. Mas cu claro ta ser spera e apoyo masal di e fanaticada di Aruba cu lo bin y duna nos muchanan e sosten necesario.
Na aña 2012, Aruba a gana e derecho di representa e continente Latino America na World Series Junior League na Taylor, Michingan despues di a titula campeon. Na Taylor, Aruba a haci un tremendo papel pero a keda net cortico. Ban spera nos muchanan por haci un bon papel den e campeonato teni na cas.
Stichting Sportsubsidie Aruba a yuda subsidia e campeonato Latino Americano di baseball teni na Aruba mes.
Cumprando weganan di Lotto, e Loteria di Aruba bo ta contribui na deporte riba nos isla. Meta di St. Fundacion Lotto pa Deporte ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.