E dianan 10 – 15 Augustus lo tuma lugar na e ciudad di Panama, e Festival Centro Americano y Del Caribe den e deporte di ahedrez. Aruba tambe lo ta presente cu un seleccion di hobennan den e deporte aki. Nos muchanan lo competi den diferente categoria di U8 te cu U16. E hobencita Sylvi Cabral di apenas 6 aña di edad lo haci su debut internacional pa Aruba unda e lo competi den e categoria U8. Tambe nos lo tin den e categoria U-12 Femenino, e hungador Lesley Cielo cu a conoce un tremendo anja 2017 den e deporte di ahedrez logrando varios bon conkista mescos tambe ta conta pa Thamara Sagastegui. Den e categoria U14, Aruba ta conta cu e hungado Ilya Stetsenko cu tambe a conoce un bon anja 2017 hunto cu Ayden Dirksz, Ethan Croeze y Kyell-Jean Antonio.
Den e categoria U-16, Aruba lo ta fuertemente representa cu Brian Diaz kende tin varios experiencia den e competencianan internacional, hunto cu Diaz lo competi tambe Eldrick Donata kende a haci su comeback den e deporte despues di tabata algun tempo ausente.
Mester bisa cu e atletanan Sylvi Cabral, Leslie Cielo, Ilya Stetsenko y Brian Diaz a haya subsidio pa e torneo aki. Cu e delegacion lo biaha coach/entrenador Raymundo Dijkhoff mientras lider di delegacion lo ta Octavio Croes.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atletanan Sylvi Cabral, Leslie Cielo, Ilya Stetsenko y Brian Diaz pa e Festival Centro Americano y Del Caribe den e deporte di ahedrez.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.