E dianan 26 di juni pa 6 di juli, Aruba lo ta pais anfitrion di un di e competencianan mas grandi den e deporte di landamento den nos region. E Central American and Caribbean Amateur Swimming Confederation, CCCAN lo conta cu un participacion di 479 atleta y 148 oficial deportivo procedente di 24 pais den nos region. Paisnan participante na e campeonato di CCCAN aki hunto cu Aruba lo ta Antigua-Bahamas – Barbados -Bermuda-Cayman Islands – Colombia-Costa Rica-Curacao-Dom Republic-El Salvador-French Guyana-Grenada-Guatemala-Haïti-Honduras-Jamaica-Nicaragua-Panama-Sint Maarten-Suriname-Saint Lucia-Trinidad-US Virginia Islands.
Mester bisa cu lo competi den tres disciplina di landamento esta landamento artistico, landamento y Open Water. E competencia di CCCAN lo inicia cu landamento artistico e dianan 26 pa 28 di juni. Despues lo sigui cu e competencia di landamento cu lo ta e dianan 29 di juni pa 3 di juli. Lo culmina e competencia di CCCAN 2018 cu e competencia den Open Water Swimming cu lo ta riba dos dia esta 4 y 6 di juli. Diahuebs 28 di juni den oranan di atardi lo tin e Ceremonia di Apertura di e Central American and Caribbean Amateur Swimming Confederation, CCCAN na Piscina Olimpico Roly Bisslik na Savaneta.
Arubaanse Zwembond cu ayudo di diferente stakeholders a traha duro pa host un campeonato grandi di e magnitud aki na Aruba, e mas grandi te cu awor. Durante varios luna largo, nos atletanan den landamento artistico, landamento y Open Water a hiba un preparacion debido cu entrenamentonan tanto mainta como atardi. Awo cu e sosten y apoyo di e publico di Aruba nan lo sa bataya contra di e 23 otro paisnan den nos region den tres disciplina di deporte cu Aruba semper a resalta den nos region.
Stichting Sportsubsidie Aruba tambe a yuda subsidia e campeonato internacional di landamento Central American and Caribbean Amateur Swimming Confederation(CCCAN) na Aruba organisa pa Arubaanse Zwembond.
Cumprando weganan di Lotto, e Loteria di Aruba bo ta contribui na deporte riba nos isla. Meta di St. Fundacion Lotto pa Deporte ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.