Aruba Lions Club ta trahando duro pa sigui cumpli cu nan tarea pa cu comunidad di Aruba. Ademas di e rifa grandi cu nan ta organisa anualmente di un cas, cu ta haciendo pa mas cu 25 aña caba, a dicidi di organisa otro rifa cu premionan atractivo.
E rifa “For the community to the community”a bay masha bon mes, segun Presidente Randolf M. Vrolijk, kende tabata encarga pa coordina e Proyecto aki, cual tabatin e meta pa recauda extra fondo pa Aruba Lions sigui ta activo den comunidad. “Nos di Lions tabata hopi contento con e rifa aki a bay. E ta algo extra cu normalmente nos no sa haci.”
E rifa aki a brinda e chens pa cinco persona gana un premio. E sorteo a tuma luga na Topcar unda cu e premionan a keda saca. E di cinco premio a cay riba e number 16251 cu e ganador a keda den persona di G.Roga y a bay cas cu su 1000 florin. E di cuatro premio ta 14380 cu ta dos Mountain Bike y e ganador a keda den persona di H.van den Berg, e di tres premio cu tabata un laptop a cay riba e number 17180 cu M.Ras ta e ganador, di dos premio tabata un biahe riba crucero ta 09909 cu Airport Aruba N.V. a bay cu e premio y e maximo premio cu tabata un auto a cay riba e number 18158 y e ganador a keda den persona di Dyon Croes.
Aruba Lions kier manda palabra di gradicimento na comunidad Arubano cu a coopera cu nan organisacion pa haci e rifa aki uno exitoso. Di e forma aki Aruba Lions ta haya fondo extra pa sigui duna nan contribucion na miembronan di e comunidad .
Di otro banda, Presidente di Aruba Lions Club ta informa comunidad pa keda pendiente pa nan rifa grandi mes cu ta un cas, cu nan a cuminsa traha riba dje. E sorteo mes lo tuma luga otro aña, ya cu awor nan a keda cla cu e tereno y ta bay traha riba e diseño. Nan ta spera di haya un biaha mas e cooperacion di comunidad mirando cu e club ta celebrando 70 aña di existencia y cu por medio di e rifanan aki nan por sigui Brinda servicio, no solamente den cantidad pero tambe den calidad na pueblo di Aruba.