Tur e edicionnan anterior di e Judo Challenge organisa pa Aruba Judo Bond a resulta den un exito rotundo. Diasabra awor 24 September, un bes mas, Aruba Judo Bond lo organisa e Judo Challenge 2016, esaki den su edicion number dos. E evento lo tuma luga den e compleho deportivo na Aruba Jr. na Playa y lo cuminsa pa 5or di atardi.
Lo tin combate den e categorianan infantil 1 – 2 – 3, cadet, junior y senior. Mester bisa cu e evento aki lo sirbi como un preparacion pa un evento internacional grandi di judo cu ta programa pa tuma lugar dia 12 di november proximo unda nos atletanan di judo lo midi forsa contra di otro judokanan procedente di paisnan manera Suriname, Boneiro y Venezuela. Clubnan di judo den e districtonan di Tanki Leendert, Noord, Santa Cruz, Savaneta y San Nicolas lo ta bon prepara pa e Judo Challange 2016.
E ta notabel cu e interes y acogida pa e deporte di judo bou di nos hobennan ta birando dia pa dia mas grandi mientras e competencianan ta bira mas hopi. Na varios ocasion nos atletanan di judo a haya e oportunidad di bringa den competencianan internacional y cada bes ta acumula mas experiencia y sigur tambe nivel. E hecho cu nos tabata tin representacion di e judoka Jayme Mata na e Weganan Olimpico di Rio ta haci cu cada judoka lo tin e soño pa yega un wega di e magnitud manera un Olimpiada.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e competencia di Judo Challenge 2016.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.