‘Aruba Investment Summit 2021’ organisa door di Departamento di Asunto Economico, Comercio y Industria (DEZHI) tabata un exito rotundo. E cumbre a tuma luga riba dianan 31 di mei, 1 y 2 di juni 2021. Durante e evento aki tabatin presentacionnan interesante di Aruba su top lidernan, ehecutivonan y empresarionan y tambe oradornan internacional cu a inspira y a motiva e participantenan.
E tres dianan di evento a tuma luga por medio di un plataforma digital y a ricibi un acogida di diferente participante rond mundo, incluyendo Reino Hulandes, Europa, Caribe, paisnan Latino Americano, Estados Unidos. Un total di 366 participante a registra, cu 69% di asistencia. E participantenan a duna e evento un score di 8.5 for di 10.
Resumen di Aruba Investment Summit 2021
Riba e prome dia di e Summit, e participantenan a ricibi un caluroso bon bini di Minister di Finansa, Asuntonan Economico y Cultura, Sra. Xiomara Maduro. Tambe e mandatario a lansa e logo y e branding nobo di Aruba Investment Agency (ARINA), cu awor ta un unidad di Departamento di Asuntonan Economico, Comercio y Industria. Finalmente, e mandatario a subraya e deseo pa pronto yama e participantenan Bon Bini na Aruba y pa hunto logra pa Aruba bira un ‘One Happy Investment Island’. Tambe a hiba palabra Director di DEZHI, Sra. Maria Dijkhoff-Pita cu a presenta e sectornan prometedor di Aruba. Managing Partner di MGM Source, sra. Marielsa Croes a elabora riba e clima di inversion di Aruba y Sr. Daniele Ferrara, CEO di Gianni’s Group a elabora riba su proyectonan sostenibel y diversifica cu ela inverti aden.
Riba e segundo dia, CEO y CCO di Aruba Ports Authority, Sr. Marc Figaroa y Sr. Lex de Ridder a presenta e proyectonan ‘Port City Oranjestad’ y ‘Barcadera Business Park’. CEO di Aruba Airport Authority, Sr. Joost Meijs, conhuntamente cu Sr. Shensly Tromp, Director di Airport Development & Technology a presenta ‘Aruba Gateway 2030’ y un proyecto innovativo di Aviacion Electrico. Sr. Eric Mijts, coordinador di SISSTEM na Universidad di Aruba a elabora riba e solucionan innovativo pa islanan y Sr. Martin Berkenkamp, representante di e grupo di empresanan Aleman GreenHub Technology a duna su testimonio tocante establecimento di un proyecto di inversion na Aruba.
E ultimo dia di Summit, Sr. Brad J. Sugars, Fundador y CEO di e compania ActionCOACH a duna un discurso referente ‘disruptive entrepreneurship’. Managing Director di Royal Aruba Aloe, Sr. Remko van der Veldt, a elabora riba e strategianan pa internacionalisa cu su compania a practica ultimamente. E ultimo orador, Sr. Andrei Moarcas di OCTA a presenta e estudio referente e implementacion di ‘Blue Economy in island economies’. Prome Minister di Aruba, Sra. Evelyn Wever-Croes a presenta un impresionante discurso pa clausura e cumbre aki, na unda el a enfatisa cu Aruba ta cla pa yama Bon Bini na inversionistanan nobo pa nos isla Aruba.
Resumen di e Summit
Durante e cumbre, e participantenan a haya informacionan valioso con pa inverti na Aruba, tambe a cera contactonan importante y e diferente oradornan a inspira nan pa inverti na Aruba. Pa esunan cu ta interesa pa wak Aruba Investment Summit 2021, e videonan lo ta riba YouTube riba e canal di Departamento di Asunto Economico, Comercio y Industria.
Pa mas informacion of pregunta
Pa mas informacion tocante Aruba Investment Agency (ARINA), por tuma contacto cu Zuleika Quant na DEZHI via email [email protected]
