Den cuadro di World Heart Day, dia 28 di September, Aruba Heart Foundation a bishita scolnan basico pa encurasha e studiantenan pa hunga, diberti, move mas y cuida nan curason. Cada scol a ricibi 50 cabuya pa bula cu por wordo uza individualmente y 2 cabuya largo pa uzo den grupo, por ehempel durante di les di gymnastiek.
Velma Daal, kende ta Presidente di Aruba Heart Foundation a splica cu loke e organisacion tin como meta cu e regalo aki na scolnan basico, ta pa logra cu e hobennan ta haya haci movecion “leuk”. Tambe nan kier motiva mayornan pa hunga weganan manera bula cabuya, hunga bala, core bicicleta of core na pia hunto cu nan yiunan pa asina fomenta mas movecion, cual combina cu un miho nutricion, y un miho estilo di bida, ta logra cu e hobennan ta crece den adultonan mas saludabel.
Hoofd Sport en Beweging di IBISA, esta Edgar Erasmus tabata di bishita pa haci testnan di condicion cu e hobennan di Sint Paulusschool na momento di Aruba Heart Foundation su bishita. El a bisa cu bulamento di cabuya ta intensivo y ta influencia e batimento di curason; e ta yuda sigur den mantene nos muchanan saludabel.
Velma Daal ta agrega cu movecion ta importante y esencial, mescos cu haci deporte, y kier logra nan cuminsa gosa di movecion na scol pa asina nan sigui haci mescos na cas. El a pidi pa diahuebs, riba Dia Mundial di Curason, mayornan dedica un poco mas atencion na e importancia y consciencia pa cu comemento y movecion, pa asina contribui na e bienestar di nan yiunan cu e gesto y bon ehempel cu nan ta duna nan.