Aruba Soccer Academy a uni forza cu coach Dreyer Bracho y a funda Aruba Goalkeeper Academy, un training school cu ta enfoca riba training pa keepers entre 6 pa 16 aña.
Aruba Soccer Academy ta conoci den comunidad como un trainingschool popular pa hoben futbolista. Nan ta train ambos mucha homber y mucha muher con pa mehora nan tecnica den futbol, y por remarca cu varios hungador cu ta train cu ASA a haya oportunidad pa wordo gescout door di teams internacional.
Coach Dreyer Bracho tambe ta un nomber cu hopi hende ta reconoce, mas cu tur como e hoofdcoach actual di Deportivo Nacional, division Honor, e campeonan di Copa ABC 2019. Coach Dreyer ta un coach diploma cu a completa estudio specialisa pa esaki na ambos Venezuela como España, cu licensia pa coach di Conmebol tambe, y experencia di coaching internacional.
Asina ASA y Coach Dreyer a uni nan experencia y habilidad futbolistico pa funda Aruba Goalkeeper Academy (AGA). AGA ta ofrece un training specialisa pa hoben portero cu kier siña mas cu stop goals so. ASA y Coach Dreyer ta indica cu na Aruba tin talento, pero nan kier ofrece e talento aki un lugar caminda nan por desaroya y yega na un nivel mas halto. Pa por haci esaki AGA ta trahando cu keepers cu a yega di hunga riba nivel internacional y ta e miho cu Aruba tin pa ofrece.
Coach Eric Abdul tin experencia hungado profesionalmente pa Sparta Rotterdam, tawata pa varios aña porterto di SV Dakota division Honor caminda ela logra titulo di campeon cu su team na 2017/2018. Tambe ela representa Aruba varios biaha formando parti di e seleccion nacional. Actualmente Coach Abdul ta milita pa RCA, e campeonan di division Honor 2018/2019 y alaves campeon di Copa Betico Croes.
Coach Aaron Maria tawata portero varios aña pa Vesta na Korsow, y tambe a forma parti di seleccion nacional di Korsow. Na Aruba Coach Maria a hunga cu Brazil Jrs, Deportivo Nacional y tambe a representa nos isla como parti di seleccion.
E studiantenan di AGA lo cay bou supervicion di Coach Eric Abdul y Coach Aaron Maria, cu lo percura pa ofrese un regimen di training diseña conhuntamento cu coach Dreyer. E trainingnan ta especialmente traha pa yuda e hoben porteronan bira MVP’s di defensa, distribucion y contra atake.
Un palabra grandi di danki ta bay na Burger King, cu ta e sponsor principal di AGA y a kere den e proyecto desde e prome momento.
AGA kier invita tur hoben cu ta soña cu bira keeper pa registra pa trainings. Si bo ta net cuminsando, of tin añas di experencia caba, AGA tin e nivel adecuado pa yudabo desaroya y bira imparable.
Por bishita nos Facebook pa mas informashon: AGA – Aruba Goalkeeper Academy of manda un e-mail na [email protected]