Dialuna mainta 5 di november a inicia e ‘Aruba Financial Education Week’ – cu ta parti di e plataforma internacional Global Money Week – unda cu Banco Central, Gobierno di Aruba, y varios otro organisacion di sector priva den colaboracion cu Raad van Kinderen di Aruba, a kick-off e prome evento di Money Week na Aruba di e magnitud aki. E evento a tuma luga na San Nicolas y lo sigui durante henter e siman.
Money Week lo enfoca riba educacion y conscientisacion den e area financiero pa nos muchanan, preparando nan miho pa futuro y asina stimula un desaroyo sostenibel na Aruba. E proposito ta pa educa nos futuro generacionnan con pa ta responsabel cu placa y asina aporta na e meta di un economia inclusivo y inclusion financiero.
Den un manera interactivo e muchanan a pasa diferente stacion, estilo scavenger hunt, unda cu nan a explora y siña tocante diferente aspecto di maneho di placa. Topiconan tawata entre otro: con pa spaar, gasta responsabel, inverti, duna bek, y innovacion.
Futura tambe a participa na e iniciativa aki y lo ta staciona na e ultimo stacion cu ta hiba e tema “innova”. E siman aki mas di 1000 mucha di diferente scol rond di Aruba lo participa den Money Week y tambe lo tin e oportunidad pa experiencia Mo-B Lab (e Mobile Makerspace) cu lo ta presente na e evento akin a unda e muchanan lo siña tocante plastic recycling y tambe ricibi mas informacion tocante maneranan innovativo pa spaar y maneha nan ‘zakgeld’ cu tecnologia.
Den su discurso cortico na e evento aki, Prome Minister Evelyn Wever-Croes a duna pabien y a gradici Banco Central y tur cu a haci un evento asina importante posibel pa nos muchanan di scol.
“Spaarmento y maneho di placa ta cuminsa cerca nos muchanan. Mientras cu Gobierno ta lucha cu retonan financiero, nos kier pone e base den nos muchanan. E muchanan den e proyecto aki, ta siña gana nan cen, gasta nan cen, inverti nan cen y duna bek na comunidad. Esaki ta prepara nos muchanan pa futuro nan haci miho desicionnan financiero”, Prome Minister Evelyn Wever-Croes a duna di conoce.