Sra. Esther Broeksema y sr. Giovanni de Windt di Aruba Excellence Foundation (A.E.F.) a haci entrega di e buki nobo di e Aruba Certification Program A.C.P. na director di Aruba Archivo Nacional Aruba (A.N.A.), sr. Raymond Hernandez. E Aruba Certifiaction Program A.C.P. ta diseña specialmente pa tur persona cu ta traha sea directamente of indirectamente den sector di turismo, pa asina cada persona siña informacion correcto y consistente di Aruba su historia, cultura, naturalesa nos hendenan, turismo y con pa brinda servicio excelente cu Zjeito. Archivo Nacional Aruba ta contribui grandemente cu informacion nan balioso y cu a
wordo documenta cual awor ta sirbi como fuente confiabel di informacion pa e programa di certificacion. Esaki ta e di dos instancia e siman aki cu Aruba Excellence Foundation ta haci entrega di e buki nobo.
Anteriormente a entrega na directora di Biblotheca Nacional di Aruba, sra. Astrid Britten y seccion ‘Arubiana’, un copia di e buki nobo cual lo keda warda den coleccion nacional. Seccion di B.N.A. ‘Arubiana’ tambe ta contribui grandemente cu informacion historico documenta di Aruba, cual ta sirbi como Fuente confiabel pa e programa di certificacion. Aruba Excellence Foundation a wordo institui door di Aruba Tourism Authority na Juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigi desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha, den sector di servicio y hospitalidad p’asina percura cu e nivel di servicio excelente di Aruba ya bon conoci, por keda riba un nivel halto.