Diadomingo 24 di Juni a tuma lugar na Bushiri Karting Speedway e prome Endurance Cup. Un total di 16 team a participa.
E dia a cuminsa cu inscripcion di tur e teamnan pa despues bai over na e drivers meeting cu tabata bou guia di Race Director Cedric Croes conhuntamente cu Ian Harms y Gio Wong. Durante e meeting a pone hopi enfasis riba siguridad, reglanan cu mester tene na dje riba pista y tambe ora cu kier switch coredor den e pit area.
Careda a start cu e time qualify round unda cu cada team a laga nan miho coredor subi pista pa coi su tempo, un careda hopi importante paso esaki ta dicidi ki posicion bo team lo cuminsa durante e main event.
Net prome cu e gran evento tabatin e final di e categoria Mini unda cu CJ Semeleer a sali campeon y Karston Cheng Sub campeon.
Den e time qualify Team ‘Fast Times’ by Andina Ice a coi miho tempo cu su representante ‘Nathan Richards’ sigui pa Team ‘Do It’. Cada team a haya nan posicion y tambe a trek lot pa wak cua number di kart cada team ta bai cuminsa cu ne durante e gran evento ‘Sodi World Series’ Aruba Endurance Cup round 1! Un careda di 2 ora largo unda cu cada team tin entre 2 pa 8 participante y un Team Leader y mester switch minimo 3 biaha. Tur karts a wordo poni riba un rij riba e posicion corecto di e miho tempo full dilanti. Tur piloto tambe riba un rij y manera e bandera berde baha cada piloto mester core bai nan karts pa asina oficialmente start e careda!
Algo nunca visto antes riba pista di Bushiri Karting y tambe pa prome biaha a mira tanto participante, pa ser exacto un total di 84 piloto a inscribi cu a hasi e careda aki un exito retundo! Careda tabata hopi intenso y tabatin hopi action y e resultado final a keda lo siguiente:
1.Do It, 2.Fast Times by Andina Ice, 3.Bushiri Top Guns, 4.Hyundai, 5.Nagico, 6.The Nuetrals by Two Brothers, 7.Honda, 8.Farolito Racing by Activa Trading, 9.Oil Spill, 10.Toyota,
11.Mi Setar, 12.Eumar, 13.Rapido Rapido by Setar, 14. 7 World Racing, 15. Setar Complete, 16. Bohama.
Un danki ta bai na ful e equipo di Bushiri Karting cu a hasi e gran evento aki posibel y tambe na tur partisipante. E Aruba’ Endurance Cup round 2 lo ta fin di Juli y e proximo careda ta bai ta Diadomingo awo 1 di Juli cu ta e Aruba’ Sprint Cup round 5 unda tur hende riba 15 aña por participa, Bushiri Karting mes ta provide Karts, Helm y Handschoen. Diadomingo awo nos ta wardabo na Bushiri Karting Speedway pa e proximo careda di Karting!