Dialuna atardi den e edificio monumental “Cosecha” situa den Zoutmanstraat/ Wilhelminastraat, e compania nobo Experitours, oficialmente a lansa su prome producto: “Aruba Downtown Walking Tours”. Esaki ta un atraccion/actividad nobo pa nos isla unda cu esaki a wordo traha cu e obhetivo di crea un “experiencia”. Pues no solamente un paseo na pia den Oranjestad, sino tambe combina contamento di storia di nos historia (storytelling), elementonan cultural, tradicionnan local, bishita den museonan y tambe e oportunidad di mira e preparacion y purba diferente snacks local.
E biahero di awendia tin un interes grandi riba e identidad di e destinacion cu nan ta bishita y tin un aspiracion di topa cu e hendenan local, come e cuminda local y simplemente disfruta di experiencianan cu nan no por a haya otro caminda. Encuestanan di tanto biaheronan crucero como cu aereo a remarca cu nan ta sinti falta di mas actividad unda e elementonan aki ta central. Ta trata di e asina yama “experiencianan autentico”. Y e personal di Aruba Downtown Walking Tour como Arubiano , orguyoso di nos herencia cultural, cu gusto ta mustra esaki na nos bishitantenan.
Aruba Downtown Walking Tour ta wordo brinda for di dialuna pa diasabra
y a wordo diseña pa ta atractivo tanto pa nos turistanan como nos
propio hendenan. Ya pa algun aña caba walking tours ta algo hopi uza pa explora y experencia un ciudad mas di cerca. Aunke cu den pasado Aruba a yega di tin walking tours, Aruba Downtown Walking Tours a wordo traha pa cuadra cu e deseo di e biahero di awendia y mas interactivo.
Aruba tin un historia hopi rico cual gran parti ta concentra su mes den centro di ciudad. Edificio y casnan cu ta data mas cu 200 aña ta conta storianan hopi interesante. E tour mes tin un duracion di un poco mas cu 2 ora y ta tuma luga parti mainta. E tour tin un guia cu lo duna splicacion amplio di e diferente sitio di interes y informacionan historico di Aruba. Despues di cada tour e turistanan ta haya e oportunidad di sigui explora Oranjestad riba nan mesun tempo. Ta recomendanan pa e.o come lunch, haci compras of regresa na e museonan pa un bista mas amplio.
E tour ta cuminsa y caba na e edificio di Cosecha. Jo Anne Dirksz, directora di Cosecha a splica cu den e edificio artesanonan local tin un variedad grandi di arte cu a wordo traha na Aruba. Nan ta contento cu e tour aki mirando cu mas turista ta haya e oportunidad di mira y cumpra e diferente obranan.
Pa mas informacion y pa haci reservacionan por tuma contacto cu nos
via www.arubawalkingtours.com of facebook.com/arubawalks