Durante un conferencia di prensa yama pa Cede Aruba a splica riba e proyecto di Aruba Doet cu lo bay ta den luna di maart y lo celebra 5 aña. Sr. Daniel Teckleborg a splica mas di kico ta e meta e aña aki.
Algun dia pasa tabata tin e deadline pa entrega tur e proyectonan. Aruba Doet ta e accion boluntario mas grandi di Aruba, y pa 5 aña caba nan ta stimulando scolnan, Centro nan di Bario, clubnan deportivo pa haci algo cu semper ta keda pega. E ta un proyecto cu lo hisa e nivel di e edificio.
Esaki ta di 5 aña for di 2013, unda cu a cuminsa cu 80 proyecto. Cede Aruba ta hopi contento, ya cu e meta tabata pa yega 150 proyecto, pero e aña aki a yega 190 proyecto. Pa cumpli cu tur e proyectonan aki, lo mester di total 3400 boluntario, di cual tin un cantidad caba. Pero ainda falta, mas o menos 1800 boluntario, pa logra tur e proyectonan aki.
Sr. Tecklenborg ta haci un yamado na tur hende, tur organisacion cu kier duna un man. Nan por subi riba e website www.arubadoet.com y scoge e proyecto. Aruba Doet no ta para su so, e ta un accion cu a wordo organisa prome for di Oranje Fonds di Hulanda. Na 2012 Bonaire a join e fonds aki, despues Corsou, St. Maarten y Statia a sigui.
Cede Aruba ta spera cu Aruba sali afo duna un man pa finalisa e proyectonan. Tin diferente proyectonan, tin di construccion, di verfmento, actividadnan social. Tambe tin varios gruponan di meta, caminda sigur cu cada hende cu kier yuda por pasa dos dia cu despues di e accion ta wak e resultado di biaha.