Diabierna dia 28 di Mei 2021, CEDE Aruba conhuntamente cu Oranje Fonds, ta habri e dos dianan di Aruba Doet, e accion bolunario mas grandi di Aruba. E team di Aruba Doet ta sumamente contento cu, despues di postpone e evento di maart pa mei, awor si Aruba Ta “Doet”.
CEDE Aruba y Aruba Doet kier enfatisa cu trabou boluntario ta importante pa comunidad. E ta trece un satisfaccion pa e boluntario nan, mirando cu nan lo sinti nan aporta na algo cu lo yuda na e organisacionnan. Door di eherce trabou boluntario ta planta e balornan aki den esunnan mas chikito den nos comunidad. Nan lo mira e ehempel di nan mayornan y nan tambe lo haya e gana pa haci algo bon pa nan sinti bon. Ta p’esey mes e lema di Aruba Doet ta: “Haci bon, pasa bon”. Finalmente, Aruba Doet ta crea un conexion entre e boluntario y e organisacion. E idea ta pa e trabou boluntario bira algo continuo, na unda e sosten di boluntarionan ta continua despues di e accion.
E aña aki tin 167 proyecto registra y un total di 2700 boluntario registra. Un dia prome cu e evento, ainda tabata falta 200 boluntario pa registra, pero hopi biaha mas hende ta yega sin registra. Un 75% di e proyectonan ta trabou di mantencion, manera verf, drecha y limpiesa. 20% ta cay den e categoria di agricultura, manera traha un greenhouse y planta mata. 5% ta actividad social, cual ta mucho menos cu aña nan anterior en conexion cu Covid-19.
E proyectonan ta hopi diverso y akinan ta menciona algun ehempel. Un proyecto social di e studiantenan di Universidad, cual ta encera un tayer pa hende grandi di Savaneta con pa atende y maneha cu electronica, uzo di telefon celular etc. Varios proyecto ta encera construccion di diferente ‘greenhouses’ y planta mata, entre otro proyectonan di Scol Practico pa Ofishi St. Cruz, Stichting Ban Lanta y Planta, ADRA Aruba, Movimiento ta Bida – Hunto grandi, grandi hunto, Brenchi’s Cunucu, Filomena College MAVO y Stichting Ambiente Nobo. E organisacion di ‘Reach your Goal’ tin un programa pa cuida nos cuebanan hunto cu hobennan. Tambe tin un proyecto pa stimula recreacion cu kayak pa esnan visualmente incapacita y pa crea un zipline pa hende cu limitacion.
CEDE Aruba y Aruba Doet kier tuma un momento pa gradici tur e companianan y participante cu ta duna aporte na Aruba Doet. Tin hopi negoshi cu tin Aruba Doet na pecho, y por medio di esaki ta contribui grandemente na e comunidad di Aruba. Companianan cu ta duna articulonan na hopi descuento of gratis! Esaki ta un tremendo colaboracion.
Por ultimo ta recorda cu Aruba Doet ta forma parti di un acion mas grandi ariba nivel di Reino, entre otro na Hulanda, Curacao, Boneiro, Sint Maarten, Statia y Saba. Nos ta hopi contento y agradecido cu nos por continua cu e programa den e temponan dificil aki y nos ta desea tur e participante nan hopi exito y placer cu nan proyecto.