ARUBA DOET 2019 buscando boluntario y mas!

Dialuna ultimo e team di ARUBA DOET a duna un update di kico tur ta pasando pa cu evento boluntario di mas grandi na Aruba cu lo tuma lugar diabierna 15 y diasabra 16 di maart 2019. Tambe a lansa e jingle di e campaña y a elabora poco tocante nan participacion den Carnaval 65. Den e di 7 edicion tin un total di 184 proyecto. Proyectonan di verf, chapi, traha banki, pinta, planta mata, mosaic, baile y mas. Proyectonan cu sigur tin un impacto positivo riba e grupo meta di e organisacion y boluntarionan. 163 Organisacion social a entrega proyecto entre otro scolnan, clubnan di deporte, gruponan di scouting, gruponan di 60plus, centronan di cuido, organisacionnan di bario y diferente fundacionnan. Tin mester di 3231 boluntario pa completa e proyectonan aki. Ainda falta 1061 boluntario, awo ta oportunidad pa grandi y chikito bin yuda y duna un man na nos comunidad. Inscribi como boluntario riba www.arubadoet.com
Pa di dos aña ARUBA DOET ta join Unity Carnival Group y lo participa cu e dos paradanan grandi di Aruba su Carnaval 65. Hot Ones Band lo deleita e grupo cu tremendo musica pa asina un y tur pasa super bon e fin di siman benidero. Asina ta keda pendiente pa ora e grupo yena cu ambiente, alegria y participante di e organisacionnan Ambiente Feliz, Ambiento Nobo, Sonrisa, Trampolin pa Trabao y SVGA subi e cayanan di San Nicolas y Oranjestad.
Durante e rueda di prensa a lansa tambe e jingle di ARUBA DOET 2019. E presentacion a pasa den un forma comico hunto cu e mascota di ARUBA DOET, Doeti. E jingle tin un ritmo carnavalesco y contagioso. E ta trece un mensahe cla y positvo dilanti. E idea tras di e jingle ta pa anima henter comunidad pa pone man na obra, trece dilanti e importancia di trabou boluntario y caracteristicanan di e proyecto ARUBA DOET. Titulo di e jingle ta ‘Aruba ban duna un man’. E la wordo skirbi pa Sra. Elsa Krosendijk, canta pa Sr. Francis Tromp y Sra. Arianne Westerburger y aregla pa Sr. Francis Tromp.
E peticion ta bay na henter comunidad pa duna un man pa asina nos por crea un impacto positivo den comunidad. Inscribi AWO como boluntario ariba www.arubadoet.com!
Por tuma contacto cu e team di ARUBA DOET na 582-7666 of manda un mail na [email protected] pa mas informacion.

Comments

comments