For di 1’or di marduga awa a cuminsa yobe na algun area di Aruba, indicando con e tempo lo bay ta riba dialuna.
Pa algun dia caba Meteo a informa cu lo tin un fenomeno cu lo por influencia e tempo aki na Aruba. Y esey a sosode.
E ultimo informe cu a ricibi ta cu awe tardi y awe nochi e tempo lo ta parcialmente te hopi nubla cu un awacero pasahero te breve den marduga y mañan variablemente nubla cu un awacero pasahero te breve. Temperatura maximo 33 grado Celsius temperatura minimo 27 grado Celsius.
Loke a tuma nota di dje tambe ta cu e biento tabata basta duro ayera, diadomingo, y awe mainta prome cu e yobida fuerte a cuminsa, tambe por a sintie basta fuerte. Meteo mes ta bisa cu e biento lo ta modera te basta fuerte for di direccion oost; forsa 4 te 5 (20 te 39 km/ora, 11 te 21 nudo), den dia of den awacero fuerte te posiblemente duro den rafaga; forsa 6 te 7 (40 te 61 km/ora, 22 te 33 nudo).
Situacion general di tempo pa proximo 24 oranan: un ola tropical cu ta moviendo den parti oost-centraal di Caribe lo trece basta humedad den region local durante proximo 24 oranan. Mayoria di weer lo pasa noord di area local; sinembargo, temporalmente mas nubia lo forma y pasa riba partinan di e isla treciendo algun awacero, cu chens tambe pa lamper cu strena. Localmente awacero por ta pisa y causa molester.
Condicionnan maritimo/ estado di lama: ta spera un estado di lama leve na partinan protege, y modera na partinan zuid. Na partinan oost te noordwest lama lo ta modera te localmente poco bruto te bruto cu olanan entre 5 pa 8, localmente 9 pia.
Nan ta adverti tambe cu lo por tin awacero potencial di 3 pa 10 mm. Loke por experencia henter mainta pa merdia tabata yobidanan sporadico. Na cierto areanan, pariba, a haya mas yobida cu e parti pabou.