Durante dianan 8 te cu 12 di December, Aruba Convention Bureau (ACB), e departamento di Aruba Tourism Authority cu ta encarga pa atrae gruponan di incentiva riba nos isla a tene su “Destination Review.” Esaki ta un bishita di familiarisacion cu ta wordo organisa 2 bes pa aña unda ta invita esnan encarga pa haci planificacion di tripnan incentivo, reunion, y conferencia di e mercado Norte Americano. Asina aki representantenan di ACB, Jerusha Rasmijn, Hal Davis y Diantha Boekhouwer, conhuntamente cu hotelnan y DMC’s (Destination Management Company) ta haña e oportunidad pa mustra y convence cu Aruba ta e luga ideal pa gruponan di empresa, sea ta pa incentiva, pa reunion of conferencia.
E biaha aki Ritz Carlton Aruba a brinda estadia na e grupo aki durante e bishita riba nos isla. Aruba Convention Bureau a invita un total di 9 planificadornan cu gruponan potencial. Tambe tabata tin un escritor di Prevue Magazine, un revista cu ta dirigi su mes riba e audiencia aki, cu contenido riba topiconan di “destination experiences for meetings + incentives.”
E programa di e Destination Review ta diseña na tal forma pa inclui experiencianan unico pa mustra e variedad di oportunidadnan cu Aruba por ofrece na e gruponan di empresanan riba tereno di F&B, decor y entretenimento. Un total di 8 hotel y 4 DMC a contribui na e programa di e Destination Review aki. Durante e dianan tabata tin diferente evento na e hotelnan participante pero tambe eventonan rond nos isla. Asina aki a organisa un desayuno den un cas’i cunucu, un brunch riba un barco di bela luhoso, y a clausura e programa cu un evento na Fort Zoutman. Durante e evento na Fort Zoutman a introduci e grupo cu nos tan famoso Carnaval por medio di un brassband y bailarinanan carnavalesco.
E planificadornan a keda impresiona cu e calidad cu nos isla tin pa ofrece, e amabalidad di nos hendenan, y e infrastructura cu Aruba tin pa brinda na gruponan di incentivo, reunion y conferencia. Asina aki por conclui un otro exitoso Destination review pa cu e aña aki.