Den un Marriott Grand Ballroom bunita decora y bon acompaña pa un bar y diferente aperitivo, esnan presente a haya e oportunidad pa siña conoce mas di cerca e mundo di cyber security.
E evento anual Aruba Chamber Business Event 2016 organisa door di Camara di Comercio y Industria Aruba (KvK), a tuma luga dia 20 di October 2016 y a hiba como titulo: “Ctrl-Alt-Delete: Challenge today’s Cyber Security thinking” cu a enfoca riba con pa detecta y evita atakenan cibernetico den sistema di bo negoshi. E evento a wordo patrocina door di Caribbean Mercantile Bank.
E evento a cuminsa cu un discurso duna door di Sra. Daphne Agius-Cesareo Lejuez, presidente di KvK, cu a elabora riba e situacion economico di nos pais. Akinan diferente aspectonan a wordo treci dilanti pa duna esnan presente un bista di e situacion actual cu Aruba y su economia ta pasando aden. A enfoca riba cifras di negoshi registra durante ultimo periodo caminda ta wak un registracion relativamente abou. Tambe a wordo presenta datonan colecta door di Banco Central caminda ta duna un indicacion cu economia di Aruba ta stagna y cu turismo su influencia riba esaki ta duna e resultado cu nos por wak. Remarcabel ta cu turismo di Latino America a bai atras compara cu 2015 y ta gran parti e consecuencia di e situacion di e pais bisiña Venezuela. E mensahe cu presidente di KvK kier a laga atras ta sinonimo cu e titulo di e anochi cu ta Ctrl-Alt-Del y e significado di esaki caminda cu nos tin cu reset nos forma di pensa y busca solucion inovativo pa por sigui competi den e comercio local.
Siguientemente a wordo invita riba esenario e orador renombra den e mundo di Cyber Security, e señor Hulandes Rickey Gevers. Rickey Gevers ta Chief Intelligence Officer den e departamento Computer & Network Security di e compania hulandes RedSocks. Mr. Gevers ta un ethical hacker y a yuda den diferente casonan di crimen cibernetico internacional. Mr. Gevers a duna diferente ehempel di hacking y su consecuencianan. Mr. Gevers a duna tambe un demostracion over con vulnerabel nos ta na hacking via nos smartphone of cualkier otro device. Un hacker no ta haci distincion di persona cu e lo invadi su privacidad. E la impresiona e publico ora e la mustra con hopi compania local via por ehempel e-mail adres a ser exponi den un hack caba. E publico a haya e oportunidad unico pa haci nan pregunta encuanto cyber security caminda cu Mr. Gevers a sa di duna esnan presente un miho idea over con pa preveni di ta un easy target.
Despues di e presentacion impactante di Mr. Gevers, a duna esnan presente e oportunidad pa crea y fortalece e lasonan comercial den un atmosfera ameno. Alabes por a goza tambe di e bon entretenimiento musical di Buleria.
Workshop
Diabierna 21 di october a ser duna un workshop den e auditorium di KvK caminda cu Mr. Rickey Gevers a cubri diferente aspecto relata cu cyber security. Durante e workshop esnan presente a discuti over debilidad y obstaculonan cu un compania por encontra cune y con pa e datonan di e compania por keda proteha di atakenan di hackers. A discuti algun scenario caminda tur esnan presente a comparti diferente pensamento over e topico. E workshop sigur tabata uno fructifero di cua tur presente a beneficia di e conocemento cu Mr. Gevers a bin comparti.
Pa cualkier informacion por tuma contacto cu KvK via 582-1566 ext. 27/30/35/42 of via e-mail: [email protected]