Aruba Certification Program (A.C.P.) ta tuma e prome paso pa amplia su cursonan pa hisa e calidad di servicio den e industria di hospitalidad. Aruba semper a wordo reconoci pa su hendenan amabel y cordial cu ta contribui grandemente na e sentimento di ‘One Happy Island’ y e experencia unico cu nos bishitantenan tin riba nos isla. E punto unico aki ta loke A.C.P. kier conserva den e industria di hospitalidad cu e introduccion di e ‘Service Excellence Program’.
E ‘Service Excellence Program’ ta trata diferente elementonan importante di servicio excelente den un forma informativo, interactivo y reflexion. E programa ta para keto riba e promesa di ‘One Happy Island’ cu nos ta haci na nos bishitantenan cu e responsabilidad cu nos tur tin pa cumpli cu e promesa aki. E punto aki ta importante paso e ta trata e integridad di nos isla como destinacion turistico. E programa ta provee e participante cu hermentnan pa asina e dunado di servicio por ta mas consciente di su habilidad pa duna servicio excelente.
Un componente sobresaliente di e programa ta e concepto di Zjeito, Zjeito ta e nuebe balornan cu a wordo identifica cu ta tipifica e servicio excelente autentico Arubiano. Pa nos por sigui crea e sentimento di ‘One Happy Island’ nos mester duna servicio excelente basa riba e nuebe balornan aki. Banda di esaki e programa ta toca e base di servicio excelente cu ta, actitud excelente y comunicacion excelente. E ‘Service Excellence Program’ ta complementa e ‘Programa di Excelencia di Aruba’ existente y asina aki profundisa riba e topico di servicio excelente.
Aruba Certification Program kier gradici Bucuti & Tara Beach Resort, Holiday Inn Resort, Manchebo Resort, Hilton Resort, La Cabana Resort y Avis Car rental pa a participa den e programa piloto. Pa mas informacion relaciona cu e programanan di Aruba Certification Program por tuma contacto na 280 2924 of email na [email protected]