Dos siman pasa Aruba a mira un tremendo serie di baseball di Aruba Little League unda nos a haya e finalnan den e divisionnan di Junior y Senior unda Aruba Center League(Junior) y Aruba North League(Senior) a logra e titulo di campeon. Den e weekend tras di lomba a hunga e gran final den e division di Little League(Mayor) cu a bay entre e fuerte ekiponan di Aruba Center y Aruba North Little League. Un serie cu sigur henter fanatico di baseball tabata spera riba dje. Den e ronda preliminar, e ekipo di Center a demostra su superioridad ganado tur nan weganan.
Diasabra den e prome wega di e gran final, Aruba Center League a triunfa cu e score chikito di 3 – 0, pero diadomingo den e di dos wega e ekipo di Center League a bin dicidi y ta gana 10 – 3 y ta bay cu e titulo di campeon. Awor Aruba Center Little League lo representa Aruba den e Little League Caribbean Series na Sabana Grandi, Puerto Rico den luna di juli. E aña aki e ekipo di Center League tabata forma cu hungadornan di e ekiponan di Flatstone, Stars, Grasshoppers y Aruba Rockets.
Ya pa varios anja, Stichting Sportsubsidie Aruba ta aporta grandemente na e deporte di baseball Little League unda ta yuda cu entre otro bala y otro materialnan di baseball. Tambe ta subsidia e biahe realisa pa diferente seleccionnan di baseball Little League cu ta representa Aruba den e Caribbean Little League Series como tambe e campeonatonan Latino Americano di baseball.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.