E dianan 10 y 11 di December proximo, e beachnan di Dos Playa lo bira e cas di nos miho bodyboardernan di Aruba. Durante dos dia largo lo tin bataya di gigante pa asina mira ta ken por yama su mes e campeon di Aruba den e deporte extremo aki. E evento lo carga e nomber “ABA Bodyboard Dos Playa Titans”. Mester bisa cu e participacion lo bay ta uno spectacular cu olanan entre 2 cu 3 meter di haltura. No tin duda cu e competidornan lo bay duna na tur esnan presente un show di kita sombre manera custumber.
E atletanan por competi den diferente categoria manera men’s open division, dropknee division, women division y junior division. E competencia lo ta programa pa cuminsa ya for di 8or di mainta mientras lo tin animacion musical di e miho dj-nan di Aruba. Mester bisa cu e federacion di bodyboard a conoce un aña activo unda a participa dos campeonato di taya mundial organisa pa e asociacion internacional di bodyboard, A.P.B. Den luna di September tabata Joshua Kelly cu a representa Aruba den e campeonato internacional Viana-Pro APB Tour na Viana Do Castelo, Portugal, mientras un luna despues esta oktober , e dos bodyboardernan, Jeremy Loefstok y Ruell Justina cu a competi den e “Gran Canaria Fronton King Pro 2016” teni na Islas, Canarias, Spaña. Aruba Bodyboard Association ta organisa su competencianan a base regular y ta purba a lo menos di competi un a dos bes pa aña den exterior pa asina nos atletanan gana mas experiencia internacional.
Un danki na Lotto, e loteria di Aruba cu pa medio di Comision di Subsidio a sostene e competencia di “ABA Bodyboard Dos Playa Titans 2016”, organisa pa Aruba Bodyboard Association.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.