Mediante e sentencia di 3 di februari, 2021, Corte den Prome Instancia di Aruba a ordena Aruba Bank pa habri una cuenta bancario pa BCY bou e condicionnan usual y cu e tarifanan regular, declarando cu Aruba Bank tin e autoridad pa cera e cuenta bancario si Oduber wordo condena door di e tribunal pa e delitonan di cual e ta wordo sospecha.
Aruba Bank a apela e sentencia pasobra e ta considera cu, a base di e libertad di contratacion (e libertad di determina cu ken y bou cua condicion e ta cera un acuerdo), e no por wordo obliga pa habri una cuenta bancario pa un compania cu ainda no ta cliente di Aruba Bank.
Banconan ta obliga, pa ley, pa somete cualkier persona cu ta desea di habri un cuenta na un investigacion extenso y supervision continuo di cliente existente; tal evaluacion mandatorio ta parti esencial di e legislacion relaciona cu prevencion di labamento di placa y financiamento di terorismo. Ademas un review extensivo ta wordo realisa di e business model y ta evalua e riesgonan concerni. En relacion cu lo anterior Aruba Bank a yega na e conclusion pa no habri un cuenta bancario pa BCY. Aruba Bank ta consciente de su posicion den comunidad y di e hecho cu ta difícil pa haci negoshi sin un cuenta bancario. Sinembargo, Aruba Bank ta di opinion cu, a base di e analisis realisa, e tabata tin motibonan valido pa no habri un cuenta pa BCY/ Oduber.