Aruba Bank ta patrocina e Kids & Youth Christmas Song Festival

Pa shete aña consecutivo ta organisa e “Kids & Youth Christmas Song Festival” y Aruba Bank ta sostene e bunita proyecto aki. Un total di 30 participante a forma parti di e songfestival, 10 den cada un di e 3 categorianan cu tin cual ta di 4 pa 7 aña, di 8 pa 11 aña y di 12 pa 17 aña. Meta di e Festival di Canto aki ta pa no laga nos canticanan di Pasco na Papiamento conoci como canticanan di Pasco Clasico bay perdi. Entre nan nos por menciona: Ora Solem, Den un Stal, Bon Bini niño keri, Keto Keto Keto, A nace un Niño, Awe t’un dia grandi y tambe dunando oportunidad pa cancionnan di Pasco nobo riba mercado por medio di propio composicion. Unico rekisito pa por a participa na e festival aki, ta cu e cancion mester ta di Pasco y den idioma Papiamento. E acostumbrado All Star Band, bao di encargo di e conocido Danny Koolman, a compaña e muchanan. Tin di remarca cu e banda a sa di demostra durante tur e shete añanan aki un amor inmenso pa mucha y semper tin e pasenshi pa sa di guia cada un di e participantenan. E banda a consisti di e siguiente musiconan: Danny Koolman, Diego Henriquez, Migi Boasman, Julius Martines, Jeff Gomez, Otmar Manuela, Muki Greaux y Randy Koolman. Sin laga afo e coristanan Nicole Martines-de Kort, Janaika Henriquez y Sharline Hernandis. Aruba Bank semper ta sostene proyectonan cu ta contribui na comunidad y tambe na nos cultura. Un pabien na tur e muchanan pa nan tremendo nan participacion.

Comments

comments