Durante di un conferencia di prensa na nan oficina principal na Camacuri, Presidente di e Conseho di Administracion di Aruba Bank, Michiel Helfrich a introduci Aruba Bank su website renoba www.arubabank.com, sistema bancario online avansa, y un Aruba Bank Mobile App nobo.
Segun Michiel Helfrich “Nos ta pone hopi atencion na loke nos clientenan ta pidi y como reaccion, nos sistema bancario online awo tin un cara nobo y ta conoce un mehoracion pa inclui ainda mas servicio, cuminsando awe. E website www.arubabank.com, Aruba Bank Online y e Aruba Bank Mobile App ta provee clientenan cu acceso na e banco 24/7, for di unda cu nan ta.”
Den transcurso di e ultimo dos añanan, Aruba Bank a haci inversionnan miyonario den tecnologia “state-of-the-art” y inovacion pa ofrece miho servicio na su clientenan, sucursalnan “self-service”, como tambe servicionan digital. Awe, nan ta orguyoso di por presenta e inversion mas grandi den servicionan bancario na Aruba, treciendo servicionan bancario digital di e nivel mas halto na Aruba. De facto, nan a introduci un forma di “banking” completamente digital, hasta pa clientenan nobo cu ta desea di uni na Aruba Bank!
E servicionan lo ofrece acceso facil pa uza, online y den “real time” pa cuenta(nan) y servicionan bancario, incluyendo servicio pa habri cuenta y maneho di cuenta, cambionan den informacion personal y “uploading” di documentonan personal, transferencia interno y externo, pagonan di utilidad, “address book” y notificacion di biahe.
Marc Kwaad, director ehecutivo encarga cu supervision di avancenan tecnologico y inovacion, a bisa cu “pa haci online banking mas conviniente, Aruba Bank Mobile App a agrega e funcion di acceso pa servicionan di online banking como un “soft-token” y pues e cliente no mester hiba e “hard token” (ABO Pass)” mas cun’e, pues por genera un pin code for di bo telefon mes”.
Ademas, Wendy Koffy, como e gerente encarga cu e proyecto pa e proceso, tabata contento pa anuncia cu lo transferi e clientenan existente di Aruba Bank Online pa e plataforma nobo den e proximo luna, mientras cu clientenan nobo lo tin acceso mesora na momento cu nan habri un cuenta via di e website mes.
Aruba Bank tambe a introduci su website completamente renoba, www.arubabank.com. E website nobo ta ofrece un experiencia di cliente superior y ta optimalisa pa uzo den tur “browser”, tablet y smartphone. Den transcurso di tempo cu e uzo di “mobile” ta birando mas popular pa acceso di servicionan bancario, e website lo ta ofreciendo funcionnan avansa pa “smartphone”. Aki por download e app tambe via Google Apps Store y App Store.
Cu un imagen vibrante y nobo, nabegacion y “search” facil pa uza y hopi otro funcion, e website nobo ta construi di acuerdo cu standard nan di mas moderno, cu e obhetivo pa haci “banking” mas facil, rapido y miho pa nos clientenan.
Algun di e funcionnan di e website nobo ta pa: Bira un cliente nobo (habri cuenta nobo) y funcion nobo pa maneho di cuenta, activacion online di carchi, declara carchi cu ta perdi of a wordo horta pa medio di e website, entre otro.
Pa mas informacion, por fabor bishita www.arubabank.com pa wak e seleccion di solucionnan financiero nobo y e videonan di demostracion di e funcionnan nobo di Aruba Bank Online y Aruba Bank App.