En conexion cu celebracion di Himno y Bandera, St. Paulus School a organisa su Marcha Cultural despues di tres aña. E marcha cultural ta pa presenta e conocemento di locual e alumnonan a haya den klas durante 6 siman di les di “Wereldorientatie” (orientacion di mundo) riba e tema di Aruba. Durante e parada, na un manera creativo y educativo, e team completo di St. Paulus School ta inculca e sentido patriotico den nan alumnonan door di haci uzo di diferente tecnica y materialnan pa presenta diferente obranan di arte den e marcha cultural y baile riba musica tipico di nos isla.
E marcha a tuma lugar diahuebs mainta 16 di maart, saliendo di St. Paulus School y a conta cu participacion tambe di alumnonan di Colegio Santa Teresita, Rayo di Solo Kleuterschool y Scol Caiquetios. Alabes representantenan di mercadeo di Aruba Bank a brinda e publico cu a bin presencia e marcha un dushi treat local. Aruba Bank ta contento di por a duna un man pa realisa e Marcha Cultural y aporta na e desaroyo cultural di nos muchanan. Pabien na e team completo di St. Paulus School pa organisa un tremendo marcha cultural!
