Arte ta un curiculo esencial den e calendario semanal di actividad pa e clientenan di e afdeling Verblijf na Respaldo pa sigui desaroya nan progreso personal.
Respaldo ta conta cu varios profesional dedica na trabaonan di arte. Lucia Hoek cu Miriam Arends ta haci diferente projectonan manera arte riba canvas, centerpieces, ‘backdrop’, arte riba panja, cadushi traha di foamies, arte cu fruta, decoracion pa muraya, projectonan di reciclahe y hopi mas.
Aruba Bank a scohe pa aporta na e programa di Respaldo atraves di un donacion di material di arte pa nan por sigui practica nan projectonan durante henter aña, combina cu un workshop di dos dia di pintamento. Un grupo di 6 participante di e afdeling Verbijf a forma parti di e workshop.
Durante di e workshop aki respresentante di Aruba Bank, Roxanne Croes a guia tur participante di comienso te final cu tecnicanan basico di pintamento cu verf acrilico riba canvas. En conexion cu celebracion di 45 aña di nos Himno y Bandera, a scohe e tema di “Aruba” como inspiracion pa e pintura.
Dr. van Gaalen a expresa cu e ta haya transparencia di paden pa pafor y vice versa hopi importante. Esaki pasobra no tin diferencianan fundamental entre hende cu of sin trastorno mental. Ademas Dr. van Gaalen ta enfatisa e rol importante cu arte por tin den e tratamento di stress y otro problemanan mental.
Aruba Bank ta orguyoso di e resultado final, unda cu e participantenan a demostra nan creatividad y a logra realisa nan pintura.
A pesar di e situacion existente Aruba Bank ta hopi contento di por a logra haci e workshop y a crea un bunita band cu e team creativo di Respaldo como tambe e miembronan y di mes momento agradecido cu Respaldo a habri porta pa Aruba Bank como organizacion externo.