E scolnan ta den full preparacion faltando solamente un siman pa nan completa nan proyecto di Good4theNeighborhood – Sport Edicion! E aña aki e proyectonan ta enfoca riba movecion fisico pa henter e comunidad di Aruba.
Cada scol a enfoca riba un of mas seccion den nos comunidad, organisando eventonan y conscientisando e comunidad riba e importancia actividad fisico.
Ibero American High School ta trahando duro pa crea un area recreacional den e cura di nan school cu lo ta accesibel pa e studiante, maestro, mayornan y tambe personanan cu ta biba den e vecindario di Ibero. Aki nan por bin y haci deporte, riba e plataforma nobo conhuntamente cu un “chillzone” banda di esaki. Na e momentonan aki e studiantenan ta uzando tur nan tempo liber den siman y den weekend pa traha riba cada fase di nan proyecto.
Filomena College a prepara dos dia di actividad y educacion enfocando nan esfuerso riba nos grandinan durante nan prome evento cu a tuma luga October 29 for di 8:00 te cu 9:00 di mainta na Community Pool na San Nicolas cu un tremendo Aqua Aerobic pa adulto y despues un sesion pa nos grandinan na SABA. E segundo evento lo tuma luga dia 13 di November for di 7:00 di mainta te cu 1:00 di merdia cu un variacion grandi di actividad pa grandi y chikito na varios localidad na San Nicolas.
E team di Maria College ta trahando duro pa asina brinda un grupo special den nos comunidad algun opcion pa keda den movecion. Construyendo un vloer multifuncional y un circuito pa haci deporte situa den e cura di Fundacion Sonrisa. E atletanan special cu lo haci uzo di e facilidad nobo aki tambe t’ey durante tur e simannan aki di preparacion y dia 12 di November Maria College lo tin nan fiesta deportivo unda nan lo haci entrega di e bunita proyecto aki.
Colegio San Antonio a lansa nan promocion di Actively Dushi cu ta riba rednan social y tambe organisando diferente evento pa mantene studiantenan den movecion. Nan a dedica nan proyecto na studiantenan di nan propio scol y aumenta e conscientisacion memey di nan mes.
Colegio San Antonio tin yen di streanan atletico den diferente sport cu ta motiva e otronan pa participa. Nan proyecto lo termina den un tremendo scavenger hunt cu lo tuma luga dia 12 di November.
Colegio San Nicolas ta preparando un nature walk completamente unico cu lo brinda tur participante e oportunidad pa bishita partinan di Aruba cu nunca antes nan a mira y alabes cu puntonan di actividad diferente riba e ruta. E ruta aki a wordo traha pa e studiantenan mes y nan aporta na educacion door di traha borchinan riba e ruta.
Aruba Bank ta sumamente entusiasma pa experiencia cada un di e proyectonan aki y ta aplaudi e sostenibilidad di cada un. #G4N2016