Aruba Bank a inspira studiantenan riba un futuro carera den banco

Diabierna ultimo, La Salle College a organisa un job fair pa su alumnonan. Meta di e evento aki tabata pa yuda e alumnonan haci un miho escogencia pa nanvakkenpakket durante nan estudio. E alumnonan a ricibi diferente informacion for di tur compania presente pa por scoge e miho vakkenpakket dependiendo ki trabou nan lo kier eherce den futuro.

A invita diferente orador, kendenan ta experto den nan area di trabou, pa splica di nan trabou of kico e compania tin di ofrece. E representantenan di Aruba Bank, esta Diandra Dirksz y Ruthlyne Heward di departamento di recurso humano, a elabora riba e diferente ramonan di trabou cu e banco tin di ofrece.

Aruba Bank a splica e alumnonan kico ta e estudionan cu nan mester haci pa por traha den e banco. E alumnonan a ricibi informacion riba e exigencianan di e trabou, e posibilidad di crece den trabou y competencia den trabou. Tambe e representante di Aruba Bank a elabora riba su propio experiencia di trabou, con el a cuminsa y a crece den dje.

Ta importante pa hobennan sa kico tur un trabou tin di ofrece. Tur esaki ta yuda e hobennan scoge miho e vaknan pa por sigui cu nan estudio y pa dia di mañan nan por aplica p’e trabou cu nan a studia p’e. Aruba Bank ta contento di a ricibi e oportunidad aki pa mustra e alumnonan di La Salle College kico tur nan tin di ofrece. Danki La Salle College p’e bunita gesto aki pa encurasha y inspira e alumnonan den brinda guia den scoge e direccion corecto pa cu nan vakkenpakket.

Comments

comments