Cu yegada di e artista Portugues mundialmente conoci y reconoci, Bordalo II (Bordalo Segundo), organisadornan di Aruba Art Fair 2016 ta celebra un era nobo pa Aruba como un showcase pa “arte publico” y ta cuminsa e proceso pa pone Aruba riba mapa den e segmento aki.
Bordalo II ta conoci como un artista cu un reputacion bon estableci den e disciplina di arte publico mundialmente pa su muralnan enorme di animalnan cu e ta crea cu desperdicio. Bordelo II ta e prome artista cu organisadornan di Aruba Art Fair a invita pa bishita nos isla pa crea un piesa original. E ta e prome artista cu e accepta e invitacion, y tambe ta e prome artista pa yega pa cuminsa cu e preparacionnan necesario.Bordalo II ta splica cu e ta purba pa medio di su obranan pa capta atencion di sociedadnan pa e cantidad di producto cu ta wordo consumi, pa e cantidad di desperdicio cu tin, y e efectonan di e desperdicio, of sushi, riba e comunidad en general mundialmente.Cu su obranan e ta haci un apelacion pa e ser humano cuminsa pensa riba nan custumbernan y e ta spera cu comunidad di Aruba ta compronde e obra cu e lo ta instalando riba un muraya na ATCO San Nicolas.Director di Aruba Art Fair, hunto cu Minister di Cultura, Otmar Oduber a desea Bordalo II un caluroso bonbini na Aruba.
E artista aki ta e comienso di e idea cu a bira Aruba Art Fair, Bolivar a expresa. Ademas di Bordelo II na Aruba lo tin otro artistanan for di Portugal, Alemania, Venezuela, Chile, Colombia, Mexico, Hulanda, Kazahstan, otro paisnan, y Aruba mes trahando den cayanan y riba edificionan na San Nicolas pa crea un atraccion nobo, y pone nos isla riba e mapa di cuidadnan mundialmente importante pa cu arte publico.
Bolivar a bisa cu Bordalo II ta pidi atencion pa e polucion di e reino di animal den su obranan y su instalacion, mescos cu e trabao di otro artistanan ta keda como un regalo pa comunidad di Aruba, y un atraccion pa tanto residentenan y turistanan bishita San Nicolas.A scoge ATCO como ubicacion pa e piesa di Bordalo II como cu e ta banda di e biblioteca na San Nicolas, unda cu e hobennan cu bishita biblioteca lo tin un perspectiva fresco y un bista bunita ora nan drenta y sali di e edificio.Bolivar a invita comunidad pa bishita e website www.arubaartfair.com pa registra pa e workshopnan, y pa esunnan cu ta envolvi den arte ofrece nan obranan pa wordo exponi durante di e evento mes.E instalacionnan lo keda como un regalo di Aruba Art Fair pa comunidad di Aruba y tin entre otro como meta pa aumenta e trafico di bishitantenan pa San Nicolas, pa sigui crea mas arte den luganan publico y pa atrae mas negoshi pa habri den e area.Bolivar a bisa cu un di e metanan di e organisadornan ta pa pone Aruba riba e mapa como un pais reconoci pa arte den luganan publico. Corsou ta riba e di ocho luga mundialmente, y e ta spera cu Aruba despues di e feria di arte logra wordo reconoci riba e lista, y kisas hasta logra un di cuater of di cinco luga.Aruba Art Fair 2016 ta un “turning point” tambe pa tur artista local cu ta participa, unda cu nan ta haya e “exposure” internacional y ta haya e oportunidad pa mustra na e comunidad artistico y di amantenan di arte internacionalmente loke nan ta capaz di dje pa loke ta instalacionnan, muralnan, etc. como cu nan lo ta trahando hunto cu e artistanan internacional, como tambe riba nan mes.Bishita e website www.arubaartfair.com y ta parti di un experiencia unico.
