Dialuna a yega mas di 160 persona cu ta forma parti di Torneo di Reino. Aruba a percura pa ricibi e delegacion di Boneiro, Corsou, Sint Maarten y Hulanda den gran forma den VIP Room di Aruba Reina Beatrix Airport.
Delegacion di Hulanda tabata compaña pa Prins Pieter-Christiaan, Prins der Nederlanden, cu a tuma e oportunidad di hiba palabra y gradici Aruba pa e hospitalidad na Stichting Laureus, Stichting Alleen jij bepaalt wie je bent, ehecutivonan di Ministerio di Husticia di Hulanda y na Ministernan di Cosou como tambe Gezaghebber di Boneiro y mas cu claro na mas di 120 hoben participante. Den su discurso Prins Pieter-Christiaan a splica di e proyecto y tambe di e Torneo di Reino y su bentaha pa hobennan den Reino.
Aruba su Minister di Husticia, mr. Andin Bikker tambe tabata presente y a hiba palabra deseando e delegacion un Bon Bini na Aruba y siguranan cu Aruba ta cla pa un gran siman di Torneo di Reino.
Torneo di Reino 2019 ta cuminsa 2 di october cu Ceremonia di apertura na Compleho Deportivo Frans Figaroa pa 4or di atardi. E prome wega di futbol ta cuminsa entre Hulanda 1 y Aruba 1. Despues di partido ta continua celebracion di apertura cu Popcorn Dancer y cu animacion di Rocco Franken, Wichi y Ty, kende porcierto ta cantantenan di e cancion di Torneo di Reino.
Ta di menciona cu cuminsando for di 2 di october te cu 5 di october lo tin weganan di futbol y baseball den Compleho Deportivo Frans Figaroa y Compleho Deportivo Crismo Angela y Nadi Croes for di 9or di mainta te atardi. Pa schedule di dia por subi riba Sportszone Aruba su Facebook page y keda bon informa.
Diabierna 5 di october, pa 1’or di merdia lo tuma luga e wega final y tambe otorgamento di premionan cu lo tuma luga na Compleho Deportivo Frans Figaroa pa 4’or di atardi.
Stichting Laureus, hunto cu ‘Alleen jij bepaalt wie je bent’ ta haci un invitacion na pueblo di Aruba pa bin presencia e apertura, weganan y clausura. Alabes ta pidi apoyo di nos comunidad pa presencia e weganan y hunto brinda un sosten na un manera participativo y demostra solidaridad pa cu desaroyo sano di nos hobennan cu ta futuro di nos pais y tur otro paisnan den Reino Hulandes.