E total di turismo ‘stay-over’ pa nos isla a baha cu 7.5% si compara esaki cu Augustus 2017. Si exclui e bishitantenan di Venezuela, por mira un aumento di 6.2% cual ta igual na un total di 78.860 bishitante pa nos isla. No obstante e caida di mercado Venezolano, e aumento aki ta un indicacion di stabilidad y crecemento continuo di Aruba su turismo. Alabes, e cifranan ta indica crecemento den mercadonan clave pa Aruba, manera Merca, Colombia, Argentina y Hulanda. Pa e asina yama year-to-date 2017, 719.813 turista a bishita nos isla, cual ta 6.8% menos cu e mesun temporada aña pasa. Si nos exclui e bishitantenan Venezolano, por mira un aumento di 7.5%, ekivalente na 660.354 bishitante.
Turismo ‘stay-over’
Aruba ta wordo representa den tres diferente continente. Compara cu augustus aña pasa, pa 2017 e turismo procedente for di e continente Norte Americano a aumenta cu 9.9% y ta trece 63.6% di total di turismo pa nos destinacion. Na augustus, Merca a aumenta cu 10.1% y Canada cu 5.6%. Pa e prome 8 lunanan di 2017, e continente aki a subi cu 9% pa turismo pa Aruba.
Continente Latino Americano a baha cu 30.9% di cual Venezuela a baha cu 45.9% compara cu Augustus aña pasa. Colombia a subi cu 10.8% y Argentina a subi cu 41.8%. E continente di Latino America ta trece 22.8% di e total di turismo pa luna di augustus na nos isla. Pa e prome 8 lunanan, turismo procedente di Latino America a baha cu 40.7% primordialmente mara na caida for di Venezuela.
Pa loke ta Europa por nota un cu turismo a baha cu 1.6% compara cu e mesun luna aña pasa. Hulanda a aumenta cu 4.0% pero Reinonan Uni a baha cu 8%. E continente Europeo ta representa 10.7% di turismo pa Aruba pa luna di augustus. Pa e prome 8 luna, Europa a trece 4.9% turista mas pa Aruba compara cu e mesun temporada na 2016.
Turismo crucero
Durante augustus 2017, 46.181 pasaheronan crucero a bishita nos destinacion riba un total di 16 diferente barconan crucero. Compara cu luna di augustus aña pasa, turismo crucero a crece cu 68.5% (augustus 2016 Aruba a haya 22.557 bishitante for di 11 crucero). Entotal pa e prome 8 luna di 2017, Aruba a ricibi 513.206 pasaheronan crucero for 213 diferente barco. Esaki ta ekivalente na un aumento di 22.8% pasahero adicionalpa nos isla (15 barco crucero mas) compara cu e mesun temporada aña pasa.
Turismo en general pa Aruba:
Merca su prestacion ta fuerte, hunto cu diferente otro mercado. Parti esencial di e strategia di A.T.A. tabata pa sigura cu entrada pa medio di turismo wordo afecta menos cu ta posibel. Pa esaki, aña pasa 2016 a inverti entre otro AWG 4 miyon adicional den mercadeo na Merca, cual a pusha resultado di ultimo kwartaal di 2016 y di e prome lunanan di 2017. E aña aki lo inverti AWG 2 miyon adicional pa sigui pusha Merca. Si compara volumen di Aruba pa cu otro destinacionnan den region di Caribe, por ripara cu nos destinacion ta wordo afecta fuertemente pa cu e situacion di Venezuela, aki mester tene na cuenta cu Aruba ta e mercado primario pa Venezuela tambe, den area di Caribe. E impacto di Venezuela ta wordo sinti na Aruba relativamente mas riba area di volumen, pero no riba aspectoann cu ta mara na ingreso pa medio di turismo. Venezuela ta keda un mercado cardinal, pero ora ta papia di mantene y sigui desaroya Aruba su turismo, ta importante pa sigui cu e enfoke riba mercadonan principal y continua na explora mercadonan nobo atrabes di strategianan agil y diversifica. Conforme strategia pa sigui pusha mercadonan otro cu Venezuela, lo sigui intensiva esfuersonan den ultimo cuartal di e aña aki na Merca. Merca su resultadonan fuerte, combina cu un region Latino Mericano (excluyendo Venezuela) y Europeo fuerte, ta resultando den entrada creciente pa medio di Turismo asina compensando tambe e impacto di Venezuela su volumen cu ta bao presion.
Tourism Receipts / Central Bank of Aruba
Di acuerdo cu Banco Central e asina yama ‘Tourism Receipts’, pa cu e prome tres luna (Q1) di 2017, a contribui cu AWG 872.5 miyon den nos economia, cual ta un aumento di 3.5% compara cu e mesun temporadaden 2016.
Hotelnan / AHATA
Segun Aruba Hotel and Tourism Association pa e luna di augustus, e ‘Average Daily Rate’ (ADR) a aumenta cu 5.2% compara cu 2016. Esaki den cifra ta US$ 190.05 na 2016 compara cu US$ 199.97 pa 2017. Pa e ‘Year-to-Date’ esaki a resulta den un aumento di 3.7% di US$ 236.16 na 2016 pa US$ 244.96 den 2017. E entrada pa camber disponibel, e asina yama RevPAR a aumenta cu 4.8% di US$ 162.24 na 2016 pa US$ 169.99 na 2017. Pa e prome 8 lunanan di 2017 esaki a aumenta cu 9.5%, na 2016 e tawata US$ 189.34 y pa e mesun temporada den 2017 el a subi pa US$ 207.36 E anochinan ocupa(ORN) pa camber a aumenta cu 0.7% pa augustus 2017 y pa e ‘Year-to-Date’ 2017 el a aumenta pa 6.7%.