Continuando cu e esfuersonan cu Oficina di Turismo Aruba (A.T.A.) ta haciendo pa fomenta e industria di turismo crucero, e siman aki ta bay celebra un momento grandi cu yegada di e prome 700 mil pasahero di barco crucero cu ta bishita nos destinacion. Mientras cu ta hopi satisfecho cu e resultado aki, A.T.A. tin su mira riba resultadonan ainda mas grandi den futuro.
Aruba Tourism Authority hunto cu Aruba Ports Authority ta trahando hunto pa promocion di e experiencia cu nos bishitantenan crucero ta haya na momento cu nan barco mara na nos isla. Ademas di e obhetivo aki, tambe ta comparti e vision di un bon relacion cu companianan di barco crucero, mehoracion di infrastructura y e trato amabel cu e bishitantenan ta haya di nos comunidad.
Globalmente, mayoria di e mas cu 20 miyon persona cu ta subi un barco crucero, ta scoge un cu ta keiro den Caribe. Aruba, atrabes di A.T.A. y APA ta busca pa bira e destinacion mas memorabel, un cu e pasaheronan lo kier bishita bek pa pasa mas tempo. Di e manera aki ta yega na un turismo sostenibel cu resultadonan positivo riba termino corto y largo.
Algun di e metanan di A.T.A. pa 2018 ta pa: aumenta e bishita di turista crucero cu un minimo di 7% compara cu 2017 – desaroya e lazonan comercial cu e industria crucero cu mira riba 2019 y mas leu enfocando esfuersonan riba diversificacion y garantisando bishitanan pa nos destinacion durante ‘low season’, como tambe bishitanan mas largo – stimula e consumo di turista y tripulacion di crucero riba nos isla; y crea programanan pa aumenta e conversion di e turistanan crucero pa turistanan ‘stay-over’.
Estadistica cu A.T.A. ta dispone di dje, ta indica cu pa fin di 2017, e entrada for di sector crucero lo alcansa 85.5 miyon Dollar, cual ta representa un aumento di 21% compara cu 2016. Ta premira cu Aruba lo keda conoce desaroyonan alentador manera esaki, mientras cu A.T.A. ta sigui traha di cerca cu tur socio den e gremio. Ta fomentando un bon relacion cu tour operators y comerciantenan di e area, ademas di otro entidadnan publico y priva.
Na tur socio den turismo y na Aruba completo, masha pabien cu nos di 700 mil turista crucero! Ban sigui demostra con nos ta e One Happy Island y cu nos compromiso ta cu Aruba!