Un biaha mas e modelonan di The Chaz Modeling & Talent School a sa di representa nan dushi isla Aruba cu hopi orguyo internacionalmente. Un delegacion a biaha siman pasa dialuna rumbo pa Punta Cana na unda lo a tuma lugar e evento di Agnes Universe 2024 y tambe Draft Models 2024.
Den Agnes Universe Aruba tabata tin 2 representante kende nan tabata Eve Hoftijzer cu a logra e titulo di tercera finalista den su categoria di Little Beautiful Universe 2024. Caithlyne Kock a logra e titulo maximo di Pre-Teen Model Universe 2024 den su categoria, y tambe mihor Gala Dress y mihor Trahe di Fantasia. E competencia tabata fuerte na unda cu varios pais tabata presente cu representantenan, manera entre otro USA, Venezuela, Colombia, Republica Dominica, Rusia, Spaña y Peru.
Den e evento di Draft Models Aruba tabata tin 4 modelo cu a participa, Eve Hoftijzer, Caithlyne Kock, Cristalyne Kock y Carolyne Kock. E modelonan a haci varios fotoshooting na unda nan potretnan lo wordo manda pa agencianan di moda por kies y tambe lo wordo poni riba plataformanan pa por wordo escohi dor di agencianan di moda, companianan y tambe commercials. Nos modelonan a participa den un runway tambe di varios designers. Nos 4 modelonan a wordo selecciona pa por participa na Paris Fashion Week 2025 y Republica Dominicana Fashion Week 2025. Durante e siman nan cu ta bin lo haja e resultado tambe di ken a haja e oportunidad di bay Paris Fashion Week cu tur gasto paga, cual ta e premio maximo di Draft Models.
Aruba nos ta orguyoso di nos representantenan cu a sa di saca cara di Aruba. Nos di The Chaz Modeling & Talent School ta kere den nos talentonan local y lo sigi aporta na nan desaroyo. Nos ta bay tin mas evento internacional e aña aki na unda varios modelo di nos skol lo haja oportunidad di participa. Y sigur nos lo ta preparando pa mas evento internacional pa otro aña tambe. Un pabien na nos muchanan modelo cu a haci nan best y a haja un experiencia grandi. Un danki special na e estilista y make up artist Elvis Hurtado di The Salon cu a companja y prepara nos modelonan durante full e siman, Elvis bo tabata master! Tambe un danki na un y tur cu a juda cu e participacion di nos modelonan na eventonan internacional.
