Dos medaya di brons pa nos ciclistanan cu a competi den e Youth Caribbean Cycling Championship
E dianan 11 y 12 di augustus ultimo, un delegacion den e deporte di ciclismo di ruta a competi den e Youth Caribbean Cycling Championship na Bermuda. E aña aki e competencia a wordo organisa pa e federacion di Bermuda di ciclismo. Mester bisa cu Aruba a sali cu un delegacion di 7 ciclista kendenan lo midi forsa contra e otro coredonan junior di Caribe. E atletanan cu a haya e oportunidad pa representa Aruba ta Joshua Krozendijk, Akeem Kock, Reegel Winklaar, Ruson Gonzalez, Silvienne Gonzalez, Anthony Wilson, y Imru Maduro.
Riba e prome dia di competencia nos ciclistanan a core e famoso careda contra holoshi, mientras pa su mañan diadomingo a core e careda di ruta. Nos atletanan junior a hiba un preparacion debido di varios luna y mester bisa cu nan a briya durante di e Youth Caribbean Cycling Championship ganando dos medaya di brons pa Aruba. E cilcistanan Silviene Diandra Gonzalez y Joshua Krozendijk a triunfa cu medaya di Brons den e Youth Caribbean Cycling Championship aki. Tanto Joshua y Silviene a demostra nan potencia den e campeonato di Caribe y logra un di tres lugar den nan respectivo categoria. E ciclistanan Ruson Gonzalez y Reegel Winklaar tambe a core e time trial unda Ruson ta keda na un di 5 lugar y Reegel na un di 7 lugar den nan categoria. Pa loke ta e careda di ruta su diadomingo, e ciclista Akeem Kock a logra keda na di 7 lugar y Imru Maduro na di 8 lugar mientras Anthony Wilson a keda na di 12 lugar den Junior.
Stichting Sportsubsidie Aruba ta felicita e atletanan e cilcistanan Silviene Diandra Gonzalez y Joshua Krozendijk cu nan medaya di Brons conkista den e Youth Caribbean Cycling Championship
Lotto, e loteria di Aruba tin diferente wega; Catochi, Big 4, 1-OFF, Zodiac, Wega di Number Korsou di Lotto, Lotto di Dia, Lotto 5, Mini Mega cu su Mega Plus y e weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba